Press "Enter" to skip to content

Pynkhreh ka sorkar Assam ban buh ktem shipai ha shnong Umwali

Nongstoiñ, Naiwieng 8: Ka sorkar Assam ka la bteng ïa ka jingjurip ha ki jaka khappud jong ka West Khasi Hills khamtam ha ka thaiñ Langpih bad mynta ka la pynkhreh ban buh noh da ka ktem jong ki shipai Gorkha Regiment.
Hadien ka jingïoh jingtip jong ka jingwan kiew jong u Deputy Commissioner jong ka Kamrup lem bad
ka kynhun pulit ha ka sngi nyngkong jong ka taiew na ka bynta katei ka jingthmu, na ka liang u nongthoh khubor dalade u la leit sha katei ka jaka ban kylli bniah na ki paidbah ha katei ka thaiñ.
Haba ïakren bad ki riew rangbah, ki la ïathuh ba ka long kaba shisha ba u Deputy Commissioner bad ki heh pulit jong ka Kamrup ki kiew sha ka thaiñ Langpih. Ki la ïathuh ki dak ki shin ki pyni ba ki thmu ban pynkhlaiñ shuh shuh ïa ki bor pahara da kaba buh syndon ïa ka kynhun pyrton shipai ha katei ka thaiñ. Ki la ong ruh ba kitei ki heh sorkar na Assam ki la leit ban jurip ïa kawei ka jaka marjan bad ka wah Umlon kaba don ha ka shnong Umwali kaba don ha ka thaiñ Langpih.
Ki riew rangbah ki la ïathuh ruh ba naduh ka 30 tarik jong u bnai ba la dep ka sorkar Assam ka la dep phah shi pyrton ki shipai bad la pynsah ïa ki ha kawei ka ïing kaba don harud jong ka surok ban leit sha ka shnong Umyiap, kaba ïaid lyngba ka Mawkoibari bad Miangbyrkong. Hynrei ka jingwan biang jong ki mynta ka kynti bad poi haduh ha Umlon, ka dei beit ka jingthmu ban jurip ïa katei ka jaka na ka bynta ban buh ïa katei ka ktem shipai kaba neh shisyndon.
Halor kane, na ka liang ki riew rangbah ki la kynthoh ïa ka jingbym kren ei ei jong ka sorkar Meghalaya ïa ka sorkar Assam na ka bynta ban pynbeit noh ïa u pud u sam ba thikna. Kumta ka la nang ai mynsiem shuh shuh ïa ka sorkar Assam ba kan ïai bteng ban pynkhlaiñ ïa ki bor pahara ha ki thaiñ Langpih.
Nalor nangta, ki katto katne ki riew rangbah jong ka shnong Langpih, Nongmawleiñ, Umtap bad kiwei kiwei, ki la kynnoh ruh ba dei jingbym don bor jong u Acting Syiem jong ka Hima Nongmynsaw Syiemship ba la thung da ka EC jong ka KHADC u bah Pynshngaiñ N Syiem. Ki la kam ruh ong ba ha ki snem ba la dep myn ba ym pat don Acting Syiem, ïa ka synshar khaddar dang pynïaid da u Sirdar ka Hima Raidmynsaw u bah Hindro Samakha, ki paidbah kim ju ailad hynrei ki ieng ban pyrshah ha kaba wat ki heh sorkar Assam ruh ki hap ban pyndem. Hynrei u Acting ba mynta um ler.
Don ruh kiba la kynthoh ba kane ka sorkar ka dei ka sorkar kaba tlot tam na baroh ki sorkar kiba la bat ïa ka jingsynshar ha ka jylla ha kine ki sawphew snem tam. Ka daw ba kongsan ka long namar ka dei ka sorkar kaba la shah teh lakam ha ka BJP na Assam. Kumta kam nud satia ban ang wat tang shikyntien ruh.