Press "Enter" to skip to content

Shah thombor ka Kong Agnes ha ki suba runar khaïi dewïong beaiñ ha East Jaiñtia Hills

>>Kerkut bad bom kumba 30 ngut ki shynrang bad kynthei     >> Pynrem jur u CM, leit jngoh u Ma Sniawbhalang

Khliehriat/Jowai/ Shillong: Ka jingkhang tih dewïong ha Meghalaya ka la poi sha kaba kham sniew shuh shuh, haba ka Kong Agnes Kharshiing, President ka CSWO, kaba la kren pyrshah bha ha kine ki sngi halor ka jingkhaïi dewïong beaiñ, ka la shah thombor ha ka kynhun kaba don kumba 30 ngut eiei ba la suba kidei ki malik dewïong, ki nongbylla bad ki nongñiah trok ha ka shnong Sohshrieh, East Jaiñtia Hills ha ka sngi palei por 1 baje tam eiei mynsngi.
U Bah S Nongtnger Superintendent of Police, East Jaiñtia Hills District u la ïathuh ba la ioh jingtip u Bah M Kharkrang SSP SB ha ka por 1.40 nohphai sngi ba don ki paidbah ba shoh ïa ka Kong Agnes ha Kongong te la phah ar kynhun ki pulit kawei bala ïalam da u DSP sha Kongong bad kawei da u Incharge jong ka Ladrymbai hynrei la lap ïa ki ha Tuber Shohshrieh.
Ki pulit ki la dep ujor FIR dalade (Suo Moto) hi bad la register ha Khliehriat PS da u case No. 195 (11) 2018 u/s 307/392 IPC bad ïa kane ka case yn tohkit da u DSP. Haduh ba la thoh ïaka khubor ym pat lap ksai ki pulit eiei halor kane ka jingjia.
Ka Kong Agnes kaba la mynsaw jur na ki bynta jong ka khlieh, ka don mynta ha ka jingsumar ha NEIGRIHMS hapoh ka jingpeit jingsumar ha Intensive Care Unit. Ryngkat bad ka Kong Agnes, kawei pat ka nongtrei kam bhalang, ka Amita Sangma, kaba la ïa leit lang ka la ngat lang ha kane ka jingthombor ki paidbhur.
Katkum ka jingïathuh u Bah E. Kurbah, uba ñiah ïa kali ba ïaleit ka Kong Agnes bad ka Amita, la ong ba ki la leit sha Jaiñtia Hills ban leit buddien ïa ka jingtih bad khaïi dewïong beaiñ, wat hapdeng ka jingkhang ka NGT. Ha ki jaka ba don ki trok bad ki jingtih dewïong ka Kong Agnes ka la hiar ban shondur bad hadien kane ka la leit ujor ha Lad Rymbai Police Station, ha kaba la don ruh ki Magistrate ha katei ka jaka.
U Bah Kurbah, u la ïathuh ba dei ynda ki la wan phai na Lad Rymbai sha Shillong, ba ki la shah khang kdong ha kawei ka Gypsy, kaba um lah ban kynmaw ïa u registration number, ha ka por ba ki rung sha ki jaka ba don ki trok bad jaka tih dewïong ha Tuber Sohshrieh, kaba don ha khappud ka West bad East Jaintia Hills, kumba 20 Km na Lad Rymbai.
“La don kumba 30 ngut eiei ki paidbah kynthup ruh katto katne ngut ki kynthei, ha kaba ki la knieh ïa u shabi kali bad ki la sei ïa ka Kong Agnes bad ka Amita shabar kali ban shoh ban dat bad ka jingthmu hi imat ka long ban shim syndon ïa ka jingim”, la ong u Bah Kurbah.
U la ïathuh ba kine ki paidbah, ki la tied da ki dieng ki maw patom na u shñiuh bad haba la kyllon ha madan, ki la ïuh la kyrdem. U la ïathuh ruh ba i Kong Agnes i la ïaksaid ban phet, hynrei im lah shuh, namar ba la bun palat ki nongthombor.
U Bah Kurbah, u la ïathuh ba haba kine ki arngut ki kynthei briew ki la shah thombor kumtei, uwei u briew u la tan noh ïa u shapoh ka Bolero ban kit noh ïa u na katei ka jaka shawei pat, da kaba ong ba lada un don lang ha kane ka jaka, ma u ruh (E.Kurbah) un shah shoh lang, namar ha katei ka kynhun ki don ruh ki khun Minister. “La ïalam noh sha kawei ka jaka ba jngai kumba 1 KM eiei na katei ka jaka bad ki la knieh noh ruh ïa ka mobile bad pyllait noh ryungkat bad ka jingbyrngem ba lada nga pyntip briew, ngan shah pynïap”, u la ong.
Haba la pyllait kumne, u Bah Kurbah u la ïaid da ka kjat ban leit biang sha ka jaka ba shah shoh kine ki longkmie bad lap ïa ki ba ki thiah lyngktar ha madan bad kita ki paidbah kin don shuh ha katei ka jaka. Haba u la ïoh tam ïa u shabi jong ka kali, u la ñiah bad wan wad jingïarap na ka surok ban wan sha Jowai. Ynda u la poi ha Lad Jowai, u la lap ïa ki Pulit kiba talasi trok ha katei ka jaka bad pyntip ïa katei ka jingjia ha ki. Kine ki Pulit pat ki la pyntip sha ki Pulit jong ka Lad Rymbai kiba la leit sha katei ka jaka bad lap ïa ka Amita kaba la wan par jubor sha surok bah. Hadien kane ki la leit shim sa ïa ka Kong Agnes bad pynkit ïa ki baroh arngut sha Jowai Civil Hospital, Ïalong.
U Bah Kurbah, u la ïathuh ruh ba kine ki runar ki la pyrshang ban thang ruh ïa kali jong u, tangba kim shym la ïoh bad katkum ka jingïathuh jong u, ka Kong Agnes imat ka ithuh ïa uwei na kiba na ki briew ba don ha katei ka jaka, namar ba u la ong ïa ka Kong Agnes ban ïakren shuwa, hynrei ka Kong Agnes ka la ong ba kin leit noh. Dei ha katei ka por ba kawei ka kynthei ka la knieh noh ïa u shabi ka kali jong u.
Na Jowai Civil Hospital, hadien ka jingai jingsumar bad sop bad spaiñ ïa ki jingmynsaw la pynkit noh ïa i Kong Agnes sha NEIGRIHMS, Shillong da ka Ambulance.
Ki nongshongshnong ka nongbah Shillong, khamtam ki nongïalam Sengbhalang, ki la poi ha NEIGRIHMS shuwa ban poi ka Ambulance bad la don lang ruh ki hymmen i Kong Agnes, u Bah John Kharshiing, u Bah Francis Kharshiing, ki khun I Kong Agnes, kiba la ïam tyngeh mar ïapoi ka Ambulance, bad kumjuh ruh kiba haïing hasem bad paralok para jor.
Ka Referal Slip na Jowai Civil Hospital ka pynpaw ba I Kong Agnes i la mynsaw jur na ka khlie, ha kaba ki don artylli ki jaka pait na khlieh kiba jylliew hapdeng 7 bad 9 Centimeter. Nangta ka bynta kaba sha ka mon, ka don ka jingphlei snam kaba jur. Kane ka Referal Slip ka ong ruh ba ka Kong Agnes ka tip briew, tangba kam lah kren namar ka jingtlot palat.
Haba la ïakren bad u Bah John Kharshiing ha ka por mynmiet, u la ïathuh ba u dang don ha NEIGRIHMS bad ki Doktor ki la ïathuh ba ki 24 kynta kiban wan ki long donkam bha ka jingsumar. U la ïathuh ruh ba u Myntri ka sorkar jylla, u Bah Sngiawbhalang Dhar, u la wan mih sha NEIGRIHMS ban leit peit ïa ka Kong Agnes bad ka Amika.
Lah ban kdew hangne ba kane kadei ka jingjia kaba ar ha katei ka thaiñ ha East Jaiñtia Hills, haba ha u bnai Lber mynta ka snem, uwei na ki nongwad RTI, u Bah Poipynhun Majaw, u la shah pynïap ha katei ka thaiñ bad haduh mynta ym pat kem ïa ki briew ba donkti.
U Myntri Rangbah ka jylla, u Conrad Sangma, uba don sha Europe, u la phah ïa ka khubor ban pynrem jur ïa kane ka jingjia. U Myntri Rangbah, u la ong ba u la bthah ïa ki Pulit ban tohkit wut wut ïa kane ka jingjia bad ban kem ïa kiba donkti. Haba pynrem ïa kane ka jingjia, u Conrad u la ong ba ki kam thombor bad ki kam ïaumsnam kim dei ban ïoh jaka ha kane ka jylla bad ong ruh ba ka sur jong u paidbah ha ka imlang sahlang kadei ka bynta kaba kongsan ha kine ka pyrthei shai ba mynta.