Press "Enter" to skip to content

Ther kylla ka HNYF ïa ka jingkren khlem nongrim u CEM ka Karbi Anglong

Nongpoh, Naiwieng, 08: Tang hadien ka jingmih khubor halor ka jing kren u CEM ka Karbi Anglong Autonomous Council ha kaba ïadei bad ka kam khappud uba la kam ruh ba tang shi inshi ka jaka kan nym leit sha ka jylla Meghalaya ha ki khappud jong ka thaiñ Block I bad Block-II, ka Hynñiewtrep National Youth Front (HNYF) Northern Region ka la ther kylla ïa u CEM ka Karbi Anglong Autonomous Council (KAAC) ba ka jingkren jong u ka dei ka bym don nongrim haei haei ruh.
Haba kren sha ki nongthoh khubor, u Bah Marcus Marten president ka HNYF Norther Region u la ong ba kum ka seng ka dap da ka jingsngewkhia kaba jur halor katei ka jingkren jong u CEM ka Aarbi Anglong Autonomous Council watla katei ka jaka ka dang dei hapdeng ka jingïakajia kaba haduh mynta ym pat lah ban pynbeit ïa u pud u sam hapdeng ka sorkar Meghalaya bad Assam.
“Bunsien na ka liang u Myntri Rangbah bad Chief Secretary ka jylla ki la ïakren ha kaba ïadei bad u pud u sam haki thaiñ khaappud ha kaba ki ar liang mamla kila kular ruh ban pynneh bad burom mar kylliang namar ba haduh mynta ym pat blah ban pynbeit ïa u pud u sam hynrei u CEM ka Karbi anglong u Tuliram Ronghang u la shu kren lap lah da kaba kam ba ka thaiñ Block I bad Block II kan nym lei twat tang shi inshi ruh sha ka jylla Meghalaya khlem da ïakren bad ka sorkar jylla, namar ka jingpynbeit ïa u pud u sam ka shong haaka jingïakren ka sorkar Meghalaya bad Assam” la ong u Bah Marten da kaba bynrap ruh ba ka seng da lei lei kan nym pdiang ïaka jingkren jong u CEM ka Karbi Anglong bad ba ka jingkren jong u ka dei kaba khlem nongrim, u la bynrap.
U la ong ruh ba ka seng ka pynrem jur halor ka jing sngap mynthi bad ka jing bym leh eiei ka sorkar Meghalaya ha kaba ïadei bad u pud u sam, ba haduh ka sorkar Meghalaya ka shu long tang ka nongpeitkai katba ka sorkar Assam ka dang kurup bad tur pud naka por shaka por.
Ka HNYF ka dawa na ka Sorkar Meghalaya ban shimkhia ban ïakren bad pynbeit noh ïa u pud u sam mardor bad ka jylla Assam bad ka la dei ka por kaba biang eh ba ka Sorkar Meghalaya kan shim da ki lad ki lynti kiba tyngeh pyrshah ïa ka Sorkar Assam kaba la pynkheiñ ïa ka soskular wat hadien ka jingïakren sngewthuh jingmut ban burom mar kylliang katba ym pat lah ban pynbeit ïa u pud u sam, u la bynrap.
U Bah Marten u la ong ruh ba ka HYNF kan ym ailad da leilei ruh ba tang shi inshi ka jaka na ka jylla Meghalaya kan leit sha ka Assam, kumba la kam da u CEM ka Karbi Anglong katba ym pat lah ban rai bad pynbeit ïa u pud u sam bad ka Sorkar Assam wat ban ïaid da kino kino ki lynti.