Press "Enter" to skip to content

Tyrwa u Ma Vincent H. Pala ïa ka Sorkar ban pynbeit thymmai ha ka MMMC, Rules, 2015

Shillong, Naiwieng, 08: U Ma Vincent H. Pala, MP ka Lok Sabha na Shillong u la phah ïa ka jingtyrwa sha u Conrad K. Sangma, Myntri Rangbah ka Jylla ban wanrah da ka jingpynbeit thymmai ha ka Meghalaya Minor Minerals Concession Rules, 2015 na ka bynta ban plie lad ïa ka khih ka kamai jong ki trai ri trai muluk ka Jylla.
Kane ka jingtyrwa jong u Ma Vincent ka long hadien ka jingkiew ka duhkam duhjam ki paidbah nongshong shnong ka Jylla Meghalaya hadien ka jingtih bad shalan dewiong ha ka jylla.
Katkum ka jingtyrwa ba une u MP ka Lok Sabha u la phah sha u Myntri Rangbah ka Jylla, u la ong, “ka jylla jong ngi ka dei kaba la kyrkhu da ka jingdon kynrei u mawshun uba long ka jingmyntoi haduh katta katta na ka bynta ki karkhana kiba heh bad kiba rit.”
“U Divisional Forest Officer (T) Jaiñtia Hills Territorial Division, Jowai ha ka shithi kaba 30 tarik, Jylliew, 2015 u la bthah ïa baroh ki karkhana pynmih dewbilat, East Jaiñtia Hills District, Khliehriat ban kiar na kaba thied ïa u mawshun bad kiwei kiwei ki marpohkhyndew na ki jaka die kiba long be-aiñ lait noh tang na kito ki jaka tih/quarries ba la ïoh lisen ne ka Leese Deed ban khlong ïa u marpohkhyndew bad kiwei kiwei,” u la ong.
“Ka Meghalaya Minor Minerals Concession Rules, 2015 kaba ladep shna kam don kano kano ka kyndon kaba kdew na ka bynta ban khaii ïa u mawshun sha ki karkhana pynmih dewbilat watla ha ka jingshisha u mawshun u dei uwei na ki marpohkhyndew uba kongsan tam na ka bynta kine ki karkhana,” ong u Ma Vincent.
U la ong shuh shuh, “ka Himachal Pradesh Minor Minerals (Concession) and Mineral (Prevention of Illegal Mining Transportation and Storage) Rules, 2015 ha ka Para 19 ka kdew- “la kumno kumno, kumba bad haba la shalan ïa u mawshun da u nongkhaii sha ki karkhana, ïa ka khajna dei ban siew da u nongkhaii na ka bynta u mawshun.”
U la pynpaw ba ka jingtyrwa ban wanrah ïa ka jingpynbeit thymmai ka long ban wanrah biang ïa ka jingmyntoi sha ki paidbah ka jylla kiba ju im kamai jakpoh na ka kam khaii mawshun.