Press "Enter" to skip to content

Ïoh bat ka KSU Ranikor 20 ngut ki nongbylla

Mawkyrwat, Naiwieng 13: Ka Khasi Student’s Union (KSU) jong ka Ranikor Circle hynnin ka sngi 13/11/2018 ha ka jingleit khynra labour license ka la ïoh bat ïa ki 20 ngut ki bar jylla ki bym biang ki kot ki sla kiba wan trei ïa ka surok bad ka jingkieng ha shnong Photkroh, South West Khasi Hills District.
Kane ka jingleit ban khynra labour license jong ka KSU Ranikor Circle ka dei hapoh ka jingïalam jong u Marconi Thongni, President KSU Ranikor Circle ha ryngkat ki dkhot jong seng ha kaba ha katei ka jingleit khynra na ka liang jong ka seng ka la lap haduh kumba 20 ngut ki bar jylla ki bym don ki kot ki sla kiba biang (Labour License) kiba wan trei ïa ka surok bad ka jingkieng ha katei ka shnong. Shuh shuh la ong ruh ba ka seng hynnin ka sngi ka la ïoh ruh ban beh noh ïa kitei ki bar jylla da kaba bthah ruh ïa ki bad ïa ki manager ba ki dei ban da pynbiang ïa ki kot ki sla shwa ba kin wan trei hapoh ka dong ka thaiñ.
Na ka liang ki nongthohkhubor ha ka jingïakren bad u President ka KSU Ranikor Circle u la ong ba ka seng ka la shim ïa kane ka sienjam ka dei tat hadien ka jingjyllei ki briew kiba nabar kiba wan tuid sha kane ka jaka kiba wan na Assam ha kaba na ka liang ka sorkar kam shym la shim khia haduh mynta. Shuh shuh ula bynrap ruh da kaba ong, “wat hadien ba ka sorkar Meghalaya ka la pyntreikam ïa ka work permit hapoh ka jylla bad ha kaba ka la thung ruh ïa u  Labour Inspector hapoh ka Ranikor C&RD Block, hynrei kat haduh mynta ngim shym la ïohi ïa ki Labour Inspector ki ban peit pyrman halor kane.
“Kum ka jaitbynriew ba rit paid ka don hapdeng ka jingma kaba khraw hadien ba ka sorkar Assam ka la pyntreikam ïa ka NRC ha kaba ka sorkar Assam ka la kyntait haduh kumba 40 lak ngut ki nongshong shnong jong ka bad kane kan ap jingma shibun ïa ka jylla jong ngi namar haduh mynta ka sorkar Meghalaya kam shym don kano kano ka aiñ ka ban pyrkhing ïa ki briew kiba wan nabar”, ong u President ka KSU Ranikor Circle.
Ha kawei pat ka bynta ka seng ka kyntu ïa ka sorkar bad ki bor distrik ba kin shimkhia halor kane bad ha ka juh ka por la ong ruh ba lada ka sorkar ne ki bor district kim shimkhia ïa kane ka kam na ka liang ka seng kan ym shongkli-kti namar ka jingwan tuid ki bar jylla ka la nang jyllei katba nang mih ki sngi khamtam sha ki thaiñ Nongjri bad Borsora, hynrei ka seng kam banse ban ïaid sha khmat na ka bynta ka jingbha jong ka Ri bad Jaitbynriew, ong u Marconi bad bynrap ruh ba ka seng ka maham ïa baroh ki kontraktor kiba wan ïalam nongtrei bar jylla nabar ba shwa kin wanrah ïa ki nongtrei jong ki hapoh ka dong ka thaiñ ki dei ban da pynbiang shwa ïa baroh ki jingdonkam ki kot ki sla kiba biang bad ka seng kan ym ailad ïa ki bym biang ki kot ki sla ba kin wan trei ha kine dong ki thaiñ.