Press "Enter" to skip to content

Khyndiat ki Symboh pyrkhat halor ka phlim ‘NABON’

Banshan Marweiñ

La pyni ia kane ka phlim Khasi Nabon – A Journey of Faith ha India International Centre New Delhi ha ka 31 Risaw 2018 Northeast Festival ba la pynlong daka India International Centre bad ka Ministry of DONER bad ka Northeastern Council Shillong. Ka dei kawei na ki khyndiat eh ki Phlim Khasi kiba lah iohlad ban pyni (Screen) ha ki tamasa (Festival)kiba heh kum ha Delhi khamtam leilei ka Festival kaban long ha kolkatta ka International Film Festival, Kolkata ha ka taiew ba ar jong u bnai Naiwieng. Ka long kaeikaei kaba sngewsarong bad sngewtynnad shikattdei eh kum ka Jaidbynriew haba iohi bad iohsngew kum kine ki khubor. Ngi dei ban ai ka jingiarohia ki nongshna, nongak bad nongpynmih ia kane ka phlim lyngba ki jingtrei shitom ki lah lah ban shna bad ak kumto. Kum uwei na kiba lah iohi ia kane ka phlim ngan ong ka long ka phlim kaba itynnad shisha naduh ba sdang ha ban da kut. Ka jingpyrshang ban wanrah haka dur jongka phlim ia ka jingiathuh shaphang ka NabonSawian kan eh namar lehse ym lah shisha ban mutdur bad pynwandur thik kum ha kato ka por, hynrei la kumno kumno ki nongshna nongshim bynta baroh ki lah ia ksaid ban rah ia ngi sha ka 170 snem tam mynshwa kaba pynpoi pyrkhat ia ngi shibun kieie kiba lah jia ha kito ki por.Ka Ri Hynniewtrep nalor ba ka dei shisha ka Ri ba dap da ka spah mariang ka dap ruh ki kaitor, ki barikor, ki tyngshop ki puron kiba tbit ban pyni ia ka sap ka phong jong ki. Kaei kaba sngewtynnad shuh shuh ba ki nongak baroh ki dei ka sien kaba nyngkomg ban ak ha ki phlim. Ki bynta kiba bun hi la ringdur ha sohra naka jingjia ba la jia haka spah snem kaba Khatkhyndai,ka jingjia kaba jia shisha kaba dei shaphang ka jingim bad jingiaid lynti ka Khynnah samla Nabon Sawiannaduh baka dangrit bad haduh ka jingshem jongka ia ka niam Khristan, watla hapdeng ka jingkhang kaba jur bha naka liang ka iing ka sem, naduh ka Kmie, U kpanah, u mama jongka bad ka iing hi baroh kawei. Shuh shuh ka dei ka phlim Khasi kaba nyngkong eh kaban bun tam ki nongshim bynta ha ka phlim haduh 250 ki tyngshop, ki purom bad kiwei kiwei de kiba la ia shim bynta. Kiba bun ki bynta jong ka phlim la akha Sohra.
Ia kane ka phlim la directda I Director K.K. Kharlukhi naka jingwadbniah jong I Dr. HB Kharlukhi(Ba la Khlad) shaphang ka jingim jong ka Samla ‘Nabon Sawian’ bad la pynmih da ka Jingiaseng samla KJP Synod Sepngi ryngkat ka jingiatreilang bad ka Jingiaseng Kynthei. La sdang ia ka phlim da ka jingringdur ia ka shnong sohra kaba itynnad bad I phuh I phieng bad dap kyrhai bha, ha kaba ka Nabon ka iathuh khana shaphang ka jingim jongka kaba lah jia mynba ka dang rit bad sdang samla.Ka Nabon ka sdang ban thrang bad kwah ban leit skul bad ioh jingnang jingstad naduh ka por baka dangrit. Bad la pynshlur bad ailad ruh da u kpa ha kapor ba u dangim, watla ka don ka jingbym sngewtynnad napdeng ki para shnong ha kato ka por, hynrei u kpa bad ka Nabon ki khlem pynshah. La shah iaka ban leitskul ha shnong jongka hi bad hadien pat ka la leit skul sha Nongsawlia ka skul mission. Hadien baka ka iing jongka ki la tip baka sngewtynnad bad ioh mynsiem ha ka jingngeit Khristan ka kmie bad U Mama jongka ki la pyrshang bunsien bunwat ban phah wanphai noh sha iing bad ka lah wan phai hynrei ha kaba khatduh ka la raikut ban mih noh na iing namar ka jingpyrshah kaba jur naka liang ka iing ka sem. Kaba sngew tmang bad sngewktah ha ka bynta jong ka phlim ka long haka por ba ki briew jong ka sorkar Bilat ki wan ban shaw noh ia ka Nabon, ka la don ka jingiatan tyllai na baroh arliang mamla, ka Nabon ka ong ba kam lah shuh ban phaidien noh naka jingngeit ia U Trai Jisu Khrist hynrei kam mut pat baka lah ibein bad isih noh ia ka kmie bad ka iing ka sem.Ka mynsiem kaba kujingmut triang jong ka Nabon kaba ym lah ban shu bthat jubor ia ka mon ba jwat ka pynpoi haduh u pud ka jingiehnoh ia laka jongka iing ka sem.
Na kane ka phlim lah ban ringduh bad phaidien ia ka jinglong tynrai bad skhem ki briew ha kato ka por, ka jingbym kloi ban ieh ia ka tynrai bad neh dohnud hala ka jong ka tnum. Ka pyni ruh baka kur ka jait bad ka iing hi ka dangkhlain bha ka jingteh. Ka pynplie ruh ia ki jingmut jong ngi ia ka jingiapher jong ki briew kiba lah leit skul bad ki bym pat leit skul. Hooid ka pule puthi ka la wanrah shibun ka jingshai bad jingstad ia uba bun haba phai sha kine ki sngi hynrei ka pynthame bad klet noh ruh ia ka tynrai bad kiwei de ki bynta kum U Riewlum. Ka jingtylli bad longshida ki briew ha kato ka por ka batai shai bha ha kane ka phlim. La iohi ruh ba ka jingsang jingma lada ki para shnong ki lah sdang leit skul ka long kaba kynrei bha. Ka jingpyndonkam ia U sner syiar ha kaban thoh jingthoh ka la pynbitar ia ki nongshat nongkhein bad mih ki jingkren naki para shnong para thaw namarba ki khein ia ka pule puthi ba ka long ka kam kaba poh ba ym bit ban pyniadei eiei bad u sner syiar. Ka jingkynthoh jong U Mama ka Nabon ba kan leh aiu ka Kynthei ia ka Jingnang jingstad namar ka kynthei lei kam don hok ban rung ne shong dorbar. Ka jingbud halor ka jingbymshah shong dorbar ia ka kynthei ka dangneh sah haduh mynta watla kala don ka jingiatai kaba jur halor kane lyngba ka Village Administration Bill. Ka iing ka sngewrem bad sngew jah burom halor ka jingshahkren baka Nabon ka lah leit skul namar ki khein baka long ka kam ka bym dei ban leit skul.Ka jingdon bor jongki Kni ban pyniaid beit katkum ka jingkwah ka iing ngi iohi bha ha ka jinglong jong U Mama.
Ka phlim shisha ka long kaba itynnad bha naduh ka direction,rukom ak,ka rukom ring (cinematography),ka sur jingrwai (music-sound arrangement), ki ktien tynrai khasi ki bym ju kham sngew koit ha ki por mynta bad ka jingpyrshang ban riam tynrai bad ka jingpyni ia ka jingbat ia ka niam tynrai ka la ktik shisha ia ki nongpeit.Khyndiat hangne hangtai I don ito I jingkren ne ak kumba shu pule bad bym long kumba kren hi ka rukom kren ki nongak tangba kam da pher than kata katta. Nga mut ban sa don shuh shuh ki jingrwai ha ka phlim tangba katba nga kynmaw te tang kawei hi ka jingrwai. Ki don ki nongak kiba la tbit shisha kum ka Nabon, U Mama jongka, I Mem Lewis bad kiwei de, la iohi shisha ia ki jingpyrshang ban pynwan bad tynneng kum kito ki charater hi.Ka jingpyrshang ban wanrah bad kren da ki ktien kiba ym ju kham pyndonkam ka pynriewspah shuh shuh ia ka jinglong jingman ka phlim bad ka hikai ruh ia ngi ki nongpeit bad nangiai riewspah ha ka ktien lajong khamtam mynta ba ngi dang ia ksaid ban ioh kynthup noh haka khyrnit kaba phra (8th Schedule) jongka Riti synshar ka Ri India.
Ka phlim ka kut noh tang hadien baka Nabon ka lah rai kut ban mih noh na iing bad leit sah bad ki missionary bad ioh jingtip baka kmie jongka kam don hapdeng ka met kaba koit naduh baka Nabon ka lah mih na iing. Ka jingiathuh khana shaphang jongka ka dang don, halor ka jinglong nonghikai skul bad kiwei de khamtam lei lei ka jia aiu ia ka Kmie bad ka iing ka sem jongka kan jin da lah kham long bniah shuh shuh. Shuh shuh ka jingjia ha ki sngi khatduh jongka shwa ba kan khlad noh. Lehse ki nongpynmih ki lah ban pynmih ia ka Nabon bynta ba ar.Ha u snem 1851 U Rev. William Lewis U la plié ia kawei ka School ha Shella bad Ka Nabon Sawian kaba dei ka khynthei khristan ka la shah jied kum ka nonghikai ha kane ka skul bad ka la kylla long ka kynthei kaba nyngkong ha Ri. Ha u bnai July, 1848, Ka Nabon ka kylla long ka Kynthei Khasi kaba nyngkong eh ban shah pynbaptis. ka la khlad noh ha ka por baka dang dap 25 snem ha u snem 1857.Ka jingiaineh bad kut jingmut jongka Nabon ka long ka nuksa kaba bha naka bynta ki khristan bad kito kiba kwah ban long khristan kiba shem jingeh bad jingialeh, ka mynsiem len lade bad aitilut jongka sha U Kynrad jongka U Trai Jisu Khrist ka ai mynsiem ia kiba bun.