Press "Enter" to skip to content

Lap ka KSU na ka RTI ba pynjah rngai 22 lak ka tnat Soil & Conservation

Shillong, Naiwieng, 13: Ka Khasi Students Union (KSU) San Shnong Area Unit lyngba ka jubab Right to Information ba ka la pan tang na ka bynta u snem 2014-2016 na ka ophis u Divisional Soil & Water Conservation Officer (DS&WCO) ka South West Khasi Hills, ka la kam ba ka la lap ba kane ka Ophis ka la pynjah rngai haduh T. 22 lak tyngka ka pisa na ka T. 30, 440 lak ba ka la mang ban bhah sha ki 332 spah ngut ki nongïoh bhah lyngba ka Um-it Umsohphlang Watershed Scheme 2014-2016.
U Bah Pauldeep Tongwah, Publicity Secretary ka Seng ha ka jingïakynduh ïa ki lad pathai khubor mynta ka sngi baar u la ong, “ka jingpan RTI jong ka Seng na ka ophis u Divisional Soil & Water Conservation Officer ka South West Khasi Hills ka long halor ka nongrim ba ka jingtrei kam ïahap eiei ba ka skhim kumba la mang pisa namar ka pisa kaba poi sha ki nongïohbhah ka long tang T.8 lak.”
Katkum ka jingïathuh jong u Bah Pauldeep, ka seng ka la pan RTI tang na ka bynta ki san tylli ki shnong kiba kynthup ïa ka shnong Manad, Mawbidong, Lummawbah, Pyndenlyngdoh bad Pyndensohlang ha kaba ki nongïohbhah ki don haduh 332 ngut.
U la ïathuh ba katkum katei ka skhim, ka ophis u Divisional Soil & Water Conservation Officer ka la ai jingïarap pisa sha ki 332 spah ngut ban shna ïa ka jaka pynlang umslang (water harvesting), 10 tylli ki dam (CC Dam), ka jingshna ïa ki half moon terrace, thung dieng, ka jingshna ïa ki kynroh ker wahrit (loose boulder bund), jaka sara jingthung (nursery) suhjaiñ, shna maw blok, rep kwai, shna jaka pyntuid jakhlia, shna sem masi bad ka kam trei dieng.
“Katkum jingïoh jingtip na ka jubab RTI, ngi lap ba ka ophis ka la ai jingkheiñ ba la pyllait T.18,12,490 lak ka pisa sha ki 332 spah ngut ki nongïohbhah. Nalorkata, ynda ngi la tohkit bniah na ki nongïohbhah ngi lap ki ïoh pdiang tang T.800 spah marwei na kaba ki dei hok ban ïoh T.5460 hajar,” u la kynnoh une u nongïalam ka seng bad bynrap, “lada kheiñ thik pa thik ïa ka pisa kaba poi sha ki nongïohbhah ka long tang T.8 lak.”
“Hadien ba ngi la bishar bniah bad tohkit bniah bha ngi lap ba na ka T. 30, 440 lak ka skhim ba la mang ban ai bhah sha ki paidbah jong ki 18 tylli ki shnong ngi lap ba 22 lak ka la shu jah rngai na ka skhim baroh kawei,” la kynnoh u Bah Pauldeep.
U la ïathuh ruh katkum ka jingtohkit ka seng, la lap ba na ki 11 tylli ki jingtrei, ka jingpyntreikam hok ïa ka skhim ka long tang ha ka jaka sara jingthung (Nursery) bad trei dieng (carpentry) hynrei la jan baroh ki jingtrei ym ïohi syrngiew eiei hi ruh bad ïathuh ruh ba ka Seng ka lap tang kawei ka jingpyntrei ïa ka CC Dam ha ka shnong Lummawbah bad kawei ka jaka pynlang um (Water Harvesting) ba tang hapoh 10 hajar tyngka bad ka jingsam ïa ki kor suhjaiñ.
“Ngi dawa ïa ka ophis u ophis u Divisional Soil & Water Conservation Officer ban thung ïa ka jingtohkit bad ban pynshisha ïa ka jingtrei hapoh shi bnai, hynrei lym kumta ngin ïaid da kaba tyngeh,” la ong une u nongïalam ka Seng.