Press "Enter" to skip to content

Lap ka kynhun NGT ba dang bteng ka jingtih dewïong beaiñ ha Jaiñtia

Shillong, Naiwieng 13: Ka Committee ki lai ngut ki riewshemphang ka National Green Tribunal (NGT) hynne ka sngi ba-ar kala pyntip ba ka la lap ïa bunbah u dewïong ba dang shu dep tih thymmai ha ki par ba don ha kylleng ka thai East Jaiñtia Hills, kaba la shah khang ha ka NGT ban tih bad shalan ïa une u marpoh khyndew mynta la palat 4 snem.
Kane ka jingshem kala jia ruh tang hapoh shitaiew ba ka Nongïalam Sengbhalang Kong Agnes Kharshïing bad ka paralok, kila shah hiar thma ha ki Coal Mafia hapoh ka District myn ha ka 8 tarik Naiwieng. Ka Kong Agnes ka dang don mynta hapdeng ka jing shitom kaba jur hapoh North East Indira Gandhu Regional Institute of Health & Medical Science.
“Ngi la shem bun bah u dewïong ba dang shu dep tih thymmai, ym dei shuh uto uba la dep tih naduh u snem 2014. Ngi la shem ruh ïa shibun u dewïong bala lum thup ha kawei ka jaka ha Sutnga” ong u Justice (rtd) B.P.Kakatey uba dei u Chairman ka Committee.
Kat kum ka jingong jong u, “Ngi la leit sha ki thaiñ Khliehriat namar ka don ka jingkynnoh kaba la poi sha ka NGT. Nalor kata, ka don ruh ka jingkynnoh ba ka jingtih dewïong ka dang bteng haduh mynta watla la dep khang pyrshah naduh u snem 2014”.
Ka NGT ha u bnai Ïaïong 2014, kala pynjari ïa ka hukum ba khang shisyndon ïa ka jingtih bad jingshalan dewïong hapoh Jylla Meghalaya namar ka jingshem ba ka rukom tih dewïong hangne, kala ktah bad pynjot pynjulor ïa ka mei mariang nalor ka jingbym don ka jingshngaiñ ïa ki nongtih par.
U Kakatey bad arngut ki Dkhot ka Committee-u Mining Specialist na ka Indian School of Mines, Dhanbad bad u Scientific Officer jong ka Central Pollution Control Board, kila leit iuhkjat ha ki thaiñ Sutnga bad Khliehriat ban jurip ïa ki par dewïong namar ki jingkynnoh ba ka don ka jingpynkheiñ ïa ka hukum jong ka NGT.
Une u Chairman jong ka Committee ula pynpaw ruh ïa ka jinglyngngoh ba ka dang ïaid ka jingshalan ïa u dewïong lyngba ka jingïoh kurup ïa ki trok kit dewïong bad ki jingtip ba bun ki trok kit dewïong ki kylla ha ki surok National Highway. “Naei ba ki kit ïa une u dewïong?. Ka dei ban don ka hukum na ka NGT ne ka Supreme Court ban leh ïa kane. Ka NGT bad ka Supreme Court kham mynshuwa kila shah ban shalan shipor ïa u dewïong hynrei kane kala kut a katto katne bnai” ula ong.
Ka Committee kala shem ruh bun ki par dewïong kiba dang don ïa ki Machine ba dap umphniang (petrol/diessel) kaba la pyn suba jur ïa ki Dkhot ba ka jingtih dewïong ka lah ban sdang biang shen tang mar syn wan biang ka por lyiur. Ka Committee kala leh ruh ïa ka Scientific Test ïa ka Um bad ka khyndew ban lap ïa ka jingktah jong ka kam tih dewïong ïa ka mei mariang.
Kane ka Committee kan sa leit ruh ban jurip ïa ki par dewïong ha Garo Hills khamtam ïa ka par dewïong ha South Garo Hills ha kaba 12 ngut ki nongtih par kila ïap jyllop na ka jingshlei um kaba wan ksam na kawei pat ka par ba shu ieh. Kane kala jia ha u snem 2012.
Kane ka Committee kaba la thaw ha u bnai Nailar mynta u snem, kan hap ban aiti ïa ka kaiphod sha ka Tribunal manla ka arbnai tad haduh ka 6 tarik u Lber 2019, kaba dei ka sngi ba ka Tribunal kan shong bishar ïa kane ka kaiphod. La bynshet ruh ha kane ka Committee ïa ka kam ban lum jingtip ïa ki sienjam bala shim ha kaban pynjyrngam biang ïa ka mei mariang bad ban iarap ïa ki lanot nalor ban pynkhreh ïa ki action plan kat kum ka por ban pynthikna ïa ka jingtreikam ki hukum.