Press "Enter" to skip to content

Mar ïa sdang u 2019 yn leit ïakynduh ïa ki Nongsyshar ha Block-I bad Block-II

Thaw ka HANM da ka Land Protection Cell
Shillong, Naiwieng, 13: Ka High Level Committee jong ka Hynñiewtrep A`chik National Movement (HANM) kaba la shong ïa ka jingïalang mynta ka sngi baar ka la thaw ka Land Protection Cell da ka jingbuh thong ban ïada ïa ki paidbah nongshong shnong ha khappud bad ka Jylla Assam.
U Bah Lamphrangsngi Kharbani, President ka HANM haba ïakren bad u nongthoh khubor u la ong, “ngi la thaw ka Land Protection Cell jong ka seng bad lyngba kane ka shnat treikam, ngin sa leit ïakynduh ïa ki Syiem, ki Dorbar Shnong bad ïa ki paidbah, la kumno kumno ha kaba sdang jong u snem 2019, ïa ki Syiem, Dorbar Shnong bad ïa ki paidbah kiba shong basah ha khappud bad ka Jylla Assam kiba ju ïai mad bad ïai shah pyndik manla ka sngi ha ka Sorkar Assam.”
“Kumba la suit la shor ïa ka Seng naduh u snem 2008 ban ieng na ka bynta ka dawbah dawsan ban ïada ïa ka khyndew ka shyiap, nangne shakhmat ngin hap ban ïakhun tyngeh namar ngi sngewthuh ba ka khyndew ka dei ka ri bad lada ngi duh noh ïa ka khyndew ka shyiap ka mut ngi la duh noh ïa la ka ri,” ong u Bah Lamphrang.
U la ong shuh shuh ba kane ka jingïalang jong ka Seng kaba la shong mynta ka sngi ka la ïatai sani bha halor ka jingkheiñ sting shaba palat bad ka jingleh mynthi shaba palat jong ka Sorkar Meghalaya ban ïada ïa u pud u sam, kaba la pynlong ïa ka Sorkar Assam kat haduh ba ka shlur ban kyntur pud manla ka sngi da kaba pyntur da ki shipai ki swar bad ki phud ki pyrton Pulit ha khappud.
“Ngi la ïathir sani bha ruh halor ka jingshlur ka Sorkar Assam ban phut bad jynrat wat ïa u mawpud ka Meghalaya kaba la jia dang shen ha ka shnong Khanduli,” la ong une u Nongïalam ba hakhliehduh ka HANM bad bynrap ba kane ka jingïathir ka long da ka jingïashim bynta lang ki Nongïalam ka Seng na East Khasi Hills, West Khasi Hills, South West Khasi Hills, West Jaiñtia Hills, East Jaiñtia Hills District bad na Ri-bhoi District.
Ha kajuh ka por, ka seng ka ai khublei kyrpang eh ïa u Samla Damonmi S. Dkhar, uba long u General Secretary ka Seng uba la shongthait bad rung mynta sha ka jylli jong ka saiñpyrthei bad uba la pynbna ruh ban ïakhun ïa ka elekshon MDC ha u snem 2019 sha ka ingdorbar jong ka JHADC.
“Ngi ai khublei kyrpang ïa u Samla Damonmi bad ngi kyrmen ruh ba un ïoh ïa ka jingjop ïa ka elekshon MDC kaba un sa ïakhun na Nartiang Constituency khnang ba un nang lah shuh shuh ban ai ka jingshakri kaba kham bha sha ka jaidbynriew,” ong u Bah Lamphang.
Ha jingpynthymmai ïa ki nongkitkam mynta ka sngi, ka seng ka la bynshet biang ïa ka kam President ha u Bah Lamphrangsngi Kharbani, Vice President Bah Nelson Kharbani, General Secretary Bobby Basaïawmoit, Asst. Secretary Bah T. Kharir bad Bah Michael Kharmuti, Finance Secretary Bah K. Nongbri bad kiwei kiwei ki nongkitkam ka Central Body. Ki President bad ki General Secretary jong ki District, ki Circle bad ki Unit kin long ki Executive Member.