Press "Enter" to skip to content

Plie u Myntri ïa ka e-prison bad Video Conferencing ha District Jail Nongpoh

Nongpoh, Naiwieng, 13: Kum kawei na ka thong ban wan rah ka jingtrei kam katkum ka juk stad ba mynta (Digitalization) ha baroh ki phatok (Jail) jong ka jylla, ka sorkar jylla lyngba ka tnad Pulit mynta ka sngi ka la plie paidbah ban pyntreikam noh ïa ka e-prison Software bad ruh ka Video Conferencing kiba pyndonkam ha ka jingtreikam hapoh ki phatok jong ka jylla.
Ïa kane ka e-prison Software bad Video Conferencing ban pyndonkam ha ki phatok la wan ban plie paidbah da u Myntri ka tnad ka kam pohïing, u James K. Sangma kum u kongsan bad la don ryngkat lang ruh u MLA ka Umsning, u Bah Jason Sawkmie Mawlong.
Kiwei kiwei kiba la don lang ha ku Bah P. Dkhar, State informatics Officers, u Bah S. Thamar, Ri Bhoi Police chief, u Bah D.L Bareh, Superintendent ka Nongpoh District jail, ka Kong D. Phawa, Additional Deputy Commissioner bad kynthup ruh ki pulit ophisar na Ri Bhoi bad ki riew rangbah ka dong Ri Bhoi.
Haba kren ha kane ka sngi kum u kongsan, u Myntri ka tnad ka Kampohïing, u James K. Sangma u la ong ba ka sorkar ka la pyrshang ban trei shitom ban pynthikna ba baroh ki phatok yn pyntreikam noh katkum ki kor ki bor jong ka juk mynta (Digitalization) bad ruh ban pynthymmai ïa ki rukom treikam (Modernization) na ka bynta ban pynsted ïa ki kam ha kaba ïa dei bad ki kam phatok kiba dei katkum ki aiñ.
U la ïaroh ruh ïa ki ophisar kiba la trei shitom ban wan rah ïa kane ka rukom treikam ba thymmai ym tang ha ki phatok, hynrei yn pyndonkam ruh ha baroh ki ophis sorkar khnang ba kan pynsuk ïa ki paidbah ban ïoh ïa ki jingdonkam ha ki bynta bapher bapher na ka sorkar.
U la kham ban khia ruh ba ka jingpyntreikam ïa kane ka e-Prison Software bad ruh ka Video Conferencing ka long ban pynsted ïa ki kam ha kaba ïa dei bad ka jingbishar ïa ki koidi bad ruh ba ki koidi ki dei ban ïoh ïa ka hok katkum ka jingbishar hok lyngba ka ingbishar.
U la ong ruh ba ka jingpyndonkam ïa kane ka e-prison kan wan rah ka jingkylla ha ka jylla bad khamtam ha ki koidi ba kim dei ban shah ktah ïa ka hok longbriew manbriew jongki, hynrei ba kin ïoh ïa ka hok lyngba ka jingbishar hok bad ruh ka jingtreikam ruh kan sted haba la pyntreikam lyngba kine ki kor ki bor ba thymmai kiba dei katkum ka juk ba mynta.
Shuh shuh, u la ong ruh ban a ka liang ka sorkar kan shim khia katba l ah ban pynthymmai ïa ki rukom treikam ym tang ha ki phatok, hynrei wat ha ki tnad treikam bapher bapher jong ka sorkar, namar shisien ba la pyntreikam katkum ka juk ba mynta kan long ka jingsuk ïa ki paidbah ba kin ïoh ïa ki jingdonka ha ka por kaba biang, u la bynrap.
Na ka liang u T.D Khar, State informatics officer, u la ïathuh ba kane ka dei ka sien kaba lai ba la plie bad ban pyndonkam ïa kane ka e-prison bad ruh ka Video conferencing ha ka jylla hadien ba la dep banplie ha Jowai bad ha shillong.
U la ong ruh lyngba kane ka system ne ka rukom treikam, kan ïarap ïa ki paidbah ban tip ïa ka jingdon ki koidi ha ki phatok bad ïa ka jaka kaba ki shong ki sah bad ruh ka kam bymman kaba ki leh tang da kaba nion ha u budam lyngba kane ka softwar ban pyntreikam noh ha ki phatok.
U la ong ruh naduh ka e-prison bad ka Video conferencing kan ïarap ruh wat ïa ka ingbishar bad ki magistrate ban pyndonkam ha ka por ba ki bishar ïa ki koidi lane ha kiwei kiwei ki bynta ba donkam kyrkieh ha kaba ïa dei bad ka kam bishar ïa ki koidi.
Shuh shuh, u la ong ruh lyngba kine ki rukom treikam ba thymmai kan ïarap ruh ïa ki paidbah ban ïoh jingtip halor ki kam sniew ba la leh da ki runar ba la shah kem bad kiba la shah set ha ki byndi bad ruh kiwei kiwei ki kam kiba ïa dei bad ka kam aiñ ne ka kam bisar kiba dei katkum ka aiñ.
Lyngba jong kane ka sngi la pynphuh pynphieng ruh ïa kane ka sngi da ka jingrwai ki koidi kiba la rwai ka jingrwai ieit ri bad ruh ka jingrwai niam, kab along shi bynta ka jingai mynsiem ïa kiwei ki koidi ba kin kylla la ka jingim wat la ki leh ïa ki kam sneiw ba ki la shah set ha ki byndi bad ruh ban ïoh biang ka jingim kaba thymmai.