Press "Enter" to skip to content

Pynkhreh ka KHADC ïa ka ‘Clan’ Bill, kyrshan ki Seng Kur ban khang ai ‘Jait Kpa’

‘Ka kur ‘Syiem’ ne ‘Lyngdoh’ kam dei ka Kur Khasi’: Shylla
Shillong, Naiwieng 13: Ka Khasi Hills Autonomous District Council (KHADC) kala pynkhreh mynta ïa ka ‘Clan Administration’ Bill-2018, kaba tehlakam ïa baroh ki Seng Kur ka Ri-lum Khasi ba kin register noh ïalade hapoh ka Council bad ka ban pynlong ruh ïa ka Khasi Lineage Bill-2018 kaba la biang pura ban treikam ynda la pynlong aiñ.
Kane ka ‘Clan Administration’ Bill bala pynkhreh da ka KHADC ka dei kaba la tip kum ka Khasi Hills Autnomous District (Khasi Social Custom of Clan Administration) Bill-2018, ka ban sa wanrah ha ka Ïingdorbar ban wan jong ka Council.
Kum ka sienjam ban twad jingmut halor kane ka Bill, ka KHADC hynne ka sngi kala lum ïa ka jingïalang bad ki Seng Kur bapher bapher ka Ri-lum Khasi bad hadien ka jingiamur jingmut ba neh haduh lai kynta, da kawei ka jingmut la shim ïa ka rai ban pynbeit shuwa ïa kiba bun ki bynta jong ka Bill ka ban long noh tang na ka bynta ka jingregister ïa ki Kur/Jait.
“Ka ‘Clan Administration’ Bill ka dei kaba ïasoh bad ka Khasi Lineage Bill bala mynjur dang shen da ka Dorbar Kyrpang jong ka KHADC- kaba kren shai ïa ka jingdonkam jong ka Khasi Clan Certificate ban pynithuh ïa ka jinglong Khasi ba pura” ong u Bah H.S.Shylla Chief Executive Member (CEM) ka KHADC haba ïakren bad ki lad pathai khubor hadien ka jingïalang.
Haba pyntip ba ki Seng Kur kila kyrshan ïa ka ‘Clan Adminsitration’ Bill bad ai jingmut ruh ba ka Bill ka dei ban phaikhmat tang sha ka jing Register ïa ki Kur/Jait khlem da tuklar eiei ïa ki kam ki jam hapoh ka Kur/Jait ne ki Riti Treikam, u Bah Shylla ula ïathuh “Naduh lashai ngin sam paidbah ïa ka Bill sha ki Seng Kur. Ki Seng Kur ki lah ban wan shim ïa ka Bill naduh ka por 1 baje janmiet bad la buhpor ba ki lah ban phah ïa ki jingai jingmut haduh ka 18 tarik Naiwieng”.
Haba pynpaw ba ki Seng Kur ki don ïa ka bynta kaba khraw haba phai sha ka jingpyntreikam ïa ka Khasi Clan Certificate, u Bah Shylla ula ong “Ki dei ki Seng Kur/Rangbah Kur kiba hap ai ïa ka Khasi Clan Certificate. Lada ki Seng Kur kim dei kiba la register ïalade hapoh ka Council kin nym lah satia ban ai ïa ka Clan Certificate”.
“Lashai ynda la mynjur bad long ain kane ka bill, ka KHADC shuwa ban ai Khasi Tribe Certificate kan hap ïoh shuwa ïa ka Khasi Clan Certificate kaba wan na ka Kur.” ong u Bah Shylla haba bynrap Namar kata, ka long kaba donkam ba ki Kur kin Register noh khnang ba kin lait na ki jingeh kiba bun hadien habud”
Lah ban kdew hangne ba ka Khasi Tribe Certificate ka dei kawei na ki kot ki sla ba kongsan bha haba leh Scheduled Tribe Certificate napoh ka Ophis Deputy Commissioner ban pynithuh ïalade kum ki Khasi nylla.
“Ka mat Schedued Tribe Certificate kala mih ha ka jingïakren khamtam ka jingleh Online hynrei la pynshai ba ka Ophis u DC kala pynthikna ba ka Khasi Tribe Certificate ka dei kaba donkam haba ai ST Certificate.Lada kam long kumba la pynshai ngin sa thoh sha ka Sorkar Jylla” ong u Bah Shylla.
Haba antad ba ki Kur Khasi Khara kiba don hapoh u pud u sam ka KHADC kim duna ïa ka 4000 tylli ne 4000 tam, u Bah Shylla ula kyntu ïa kito ki Kur/Jait ki bym pat don Seng Kur ba kin lum kin lang noh bad ban wan register hapoh ka Council ba kin lait na kino kino ki jingeh.
Ha kajuh ka por, u Bah Shylla u pyntip ba ka jingïalang bad ki Seng Kur kala shim ruh ïa ka rai ban nym pdiang satia ba ka Kur ka Jait kan wan na u Kpa (shim jait Kpa) bad ba ka jingspek dak ïa ka Kur ka dei ban long da ka Ktien Khasi ym ban pynkylla dak phareng ne kynnoh phareng haba ai nuksa ïa ka Kur Suting, (Suttinck), Khaiñ (Chyne), Sun (Soanes), Khongwir (Conville) bad kiwei kiwei.
Haba ïadei bad ki Kur kiba ai jait ‘Syiem’ ne ‘Lyngdoh’, u Bah Shylla ula kubur ba ka kyntien ‘Syiem’ ne ‘Lyngdoh’ kam dei satia ka kur u Khun Khasi Khara hynrei ka dei tang ka kam/shuki jong ka bor synshar hapoh ka It ka Hima.
“Ngi la ïakren ïa kane ka bynta ruh bad ngi la aiti ha ki Kur ba kin pynbeit ïa kane ka kam. Kawei pa kawei ka Kur kin hap ban pynbeit noh bad kin hap ban ailang noh ïa ka Kur/Jait hok jong ki” ong u Bah Shylla haba ai nuksa kum u Syiem Mylliem, Syiem Myriaw, Syiem Twa ba kim lah ban shu ai beit tang Kur Syiem ne ki Lyngdoh Mawnai, Lyngdoh Mawphlang bad kiwei ba kin shu ai tang jait Lyngdoh.