Press "Enter" to skip to content

Tuid ki jingpynrem halor ka jing-jingshah thombor I Kong Agnes

Shillong, Naiwieng:Ka Laitumkhrah Dorbar Shong Pyllun ka pynrem jur halor ka jingshah thombor jong ka President ka CSWO I Kong Agnes Kharshiing lem bad ka paralok jong ka, ka Amita Sangma kaba la jia hapoh ka shnong Sohshrieh, East Jaiñtia Hills, ha une u taïew bala dep.
Kum ka nongshong shnong ba pura jong ka Laitumkhrah ka na ka liang ka Dorbar ka pynpaw ba ka kong Agnes kala shah thombor noh tang namar ka jingshim khia ban pynlong ka jingtohkit halor ki kam tih dewiong beaiñ.
Kumta ka Dorbar kala pynpaw ba kalong kaba sngew lehraiñ ba kum ka kynthei briew kaba pyrshang ban ïarap ïa ki bor synshar ha kaban tehlakam ïa ki kam khaïi beaiñ hynrei kala shah thombor pynban ha ka kynhun jong kumba 30 haduh 40 ngut ki briew kata kum ha kane ka jylla kaba ai jait ai khong sha ki kynthei bad burom ruh ïa ki .Nalor ba kadei ka kynthei kadei ruh ka longkmie kaba la don la ki jong ki khun ki kti.Kumta na ka liang ka Dorbar ka pynrem jur ïa katei ka kam riewkhlaw bad ka dawa na ka bynta ban shim ka jingpynshitom kaba tyngeh pyrshah ïa kito ki briew kiba donkti ha katei ka kam thombor.
Ha kajuh ka por ka Dorbar Shnong ka ai ka jingkitbok kitrwiang ïa I Kong Agnes bad ka Amita ba kin ïoh noh kloi ïa ka met kaba koit ba khiah.Kane kalong katkum u kyrwoh lyngba u Bah S B Nongdhar, Rangbah Shnong cum Chairman.
Kumjuh ka jingïakynduh ka Steering Committee jong ki Dorbar Kur kaba la long ha ka 12.11.2018, ka pynpaw ka jingsngewkhia kaba jur halor ka jingshah thombor jong I Kong Agnes bad ka Amita ha ki riew runar thrang snam ki bym don shuh ka jingkheiñ burom wat ïa ki longkmie khamtam ïa ka Kong Agnes iba long ka nongtrei mon sngewbha na ka bynta ka jaidbynriew.
Kumta ka Committee ka pynrem jur ia katei ka kam riewkhlaw bad ka kyrpad ïa ka sorkar ba kan phah kem mardor ïa baroh kiba donkti ha katei ka kam runar.
Ka Committee kala ong ruh ba lada ka sorkar ka leh sting kum ïa kine ki jait kam, ki riew thrang snam kin shim kabu ïa ka jingbym kitkhia ka sorkar ban kem.Ka Committee ka kitbok kitrwiang ruh ïa i Kong Agnes bad ka Amita ba kin ïoh noh ïa ka met kaba koit ba khiah bad ba kin lah ban nang ai ka jingshakri na ka bynta ka ri bad ka jaidbynriew.Kane ka long katkum u kyrwoh lyngba u Bah HS Suting Secretary.
Na ka liang ka YWCA, Shillong, ruh ha u kyrwoh lyngba I Kong Amaya Sohsley ka pynrem jur ha kaba ïadei bad katei ka kam thombor pyrshah ïa I Kong Agnes bad ka Amita bad ka kitbok kitrwiang ruh ba kin ïoh noh kloi ïa ka jingkoit jingkhiah.Ha kajuh ka por ka dawa ruh ba dei ban pynshitom da kaba tyngeh pyrshah ïa ki runar kiba donkti ha katei ka kam thombor katkum ka aiñ.