Press "Enter" to skip to content

Yn thung kynhun tohkit tang shu wan phai u CM : Prestone

Shillong, Naiwieng 13 : ïa ka kynhun tohkit ba kyrpang ka ban tohkit halor ka jingshah bom shah tied I Kong Agnes Kharshiing President CSWO bad ka Amita Sangma ha ka 8 tarik mynta u bnai ha Shohshrieh, East Jaintia Hills yn sa thung da ka sorkar tang shu wan phai u myntri rangbah ka jylla u Conrak K Sangma na sha bar ri. Kane ka kynhun jingtohkit kan tohkit ruh halor ka jingkynnoh ba ka jingtih dewiong beaiñ ha East Jaintia Hills ka dang ïaid beit.
Haba iakren bad ki nongthoh khubor u Deputy Chief Minister u bah Prestone Tynsong u la ong “Ngi dang ap ïa u Myntri Rangbah ba un wan phai na ka jingleit bar ri jongu khnang ban ïoh ïakren na ka bynta ban thung ïa ka jingtohkit kaba kyrpang ban lap ïa ki jingshisha halor ka jingshah thombor kine ki arngut ki longkmie na ka jingkynnoh ba ka jingtih bad shalan dewiong beaiñ ka dang bteng beit ha kane ka jylla,”
U bah Prestone u la ïathuh ruh ba ïa kane ka jingtohkit yn sa bishar ban thung namar ka la don ka jingdawa na kiba bun ki liang ba ka sorkar ka dei ban thung da ka Independent Enquiry ne ka jingtohkit ba laitluid lane ban aiti tohkit sha ka CBI ne ka NIA.
U Deputy Chief Minister u la ong ruh ba kane ka jingjia ïa I Kong Agnes bad ka paralok jong I ka long ka bym lah satia ban pdiang namar kam don shuh ka jingsngew briew bad halor kane ka jingjia u ruh ula pynrem jur tangba u la ong ym pat lah ban kynnoh ne kdew kti ïano iano tad haduh ban da ïoh ïa ka kaiphod jingtohkit. U la ïathuh ruh ba ka jingtohkit jong ki pulit ba la khlieh da u DSP ka Est jaintia Hills ruh kan ïai bteng beit.
Halor ka jingkynnoh ba ka jingkhaïi dewiong beain ka dang jur beit na kane ka jylla khamtam na East Jaintia Hills wat hadien ba la khang da ka NGT ruh u bah Prestone u la ïathuh ba na ka liang ki pulit bad ki Magistrate ki la pyrshang katba lah ban tehlakam ïa kane hynrei na ka daw ba duna briew palat ki pulit bad ki magistrate ki shem jingeh halor kane ka kam.
U la ong ruh “ Ngam pynksan ïa kino kino ki kam beaiñ tangba ki ju jia kylleng sawdong hi”. U la ai nuksa kum ka kam khaïi beaiñ ha khappud wat hapdeng ka jingpyrkhing pahara ki BSF ruh kane ka kam khaïi beaiñ ka ïai bteng beit khamtam ïa ki masi sha Bangladesh.