Press "Enter" to skip to content

Ïoh mynsiem ki nongïalam ba wan pynïasoh HSPDP ki heh PDF bad UDP

Rung u khun u Bires sha ktem ki Sing

Mawkyrwat, Naiwieng 16 : Ka Hills State People’s Democratic Party (HSPDP) jong ka Mawkyrwat Area Unit ha kine ki sngi ka la ïoh mynsiem shuh shuh bad don ka jingkyrmen ban jop ha kane ka election MDC 2019 ha kaba kiba bun ki nongkyrshan jong kiwei pat ki seng saiñ pyrthei ki la sdang phai khmat sha kane ka seng hapoh ka jingïalam jong u bah Renikton Lyngdoh Tongkhar.
Ka jingïoh bor bad nangnang khlaiñ jong ka seng HSPDP ka dei lyngba da ka jingwan pynïasoh ka kynhun napoh ka UDP ba la ïalam da u Working President ka UDP Mawkyrwat Circle, u bah Jeslanroy Nongsiej bad u General Secretary ka UDP Mawkyrwat Circle, u Bah Synshar Lyngkhoi ha ryngkat u President barim, u bah Tyngshain Kharlyngdoh bad u General Secretary barim, u bah B. Marbaniang bad kumjuh ruh na ka PDF hapoh ka jingïalam u President barim, u bah Y.G. Lyngdoh ha kaba hynnin ka sngi la pdiang sngewbha da u Bah Nolip Lyngdoh, President ka HSPDP Mawkyrwat Area Unit, ha ryngkat ka jingïadonlang jong u Bah Renik L. Tongkhar, MLA ka Mawkyrwat, bad kiwei kiwei de ki nongïalam.
Na ka liang u President ka HSPDP Mawkyrwat Area Unit, u bah Nolip Lyngdoh u la ong, ka jingwan rung jong kine ki nongïalam jong kiwei pat ki seng saiñ pyrthei mynta kan rah shuh shuh ïa ka burom jong ka seng HSPDP ha kaba kan sa jop ïa ka election MDC 2019 na ka Mawkyrwat Constituency bad kane kam pynktik tang ïa ki paidbah jong ka Mawkyrwat hynrei kan ktik ruh ïa ka Ri Khasi Jaiñtia namar ba ka HSPDP ka la nang khlaiñ katba nangmih ki sngi.
Shuh shuh na ka liang u President u la kyntu ïa baroh ki riew rangbah kiba la wan ban pynïasoh mynta ka sngi ki dei ban long kiba skhem ka nongrim bad ïaineh hapoh ka party da kaba ong ruh, “watla ka dei ka kam saiñ hima sima ruh, hynrei lada jia ba ki riew rangbah ki mih noh napoh ka seng, ka jingjah burom ka long ym tang ïa kiba phet seng, hynrei ïa ki nongïalam jong ka seng ruh kumjuh”.
“Bunsien ki seng saiñpyrthei ki shah rem noh ha ki election, namar ba ki nongïalam kim kren ïa ka sur u paidbah (haba jied ïa ki kyrtong), hynrei ki kren ïa ka sur lajong na ka bynta ka jingmyntoi shimet (self- interest)” ong u bah Nolip. Ula bynrap ruh da kaba ong, “haba ki sngewieit ïano ïano ki kren na ka bynta uta, bad dei hangta ba teng teng lada u don marwei ruh ki ong, “ani ki paidbah ki kyrshan ïa uta”. Kane ka long kaba bakla shibun bad kumta haba ngi ïakren na ka bynta ka election, dei ban ïa ai jingmut ïa ka sur u paidbah, ym dei ïa ka sur lajong, khnang ba ngin ïoh kheit ïa u soh jong ka jingjop”. U Bah Nolip kum u President u la kyntu ruh ïa ki nongkyrshan ba kin long kiba ïatreilang khlem da pyrkhat ïa ka jingmyntoi shimet la ka party ka ai tiket ïa uno uno ruh, khnang ba ka seng kan don ha ka thong jong ka jingjop.
Ha ka jingkren jong u bah B. Marbaniang, General Secretary barim jong ka UDP uba la paw ruh ha ka thup kyrteng ban ïakhun election (Aspirant Candidate) khun jong u bah B.B. Nongsiej, MLA & MDC barim jong ka Mawkyrwat (bam kwai ha dwar U Blei) ula pynpaw ba ka jingwan pynïasoh jong u bad ki nongbud sha ka HSPDP ka dei na ka daw ba ïa ka tiket MDC 2019 na ka liang ka State Election Committee jong ka UDP ki ai pynban ha u briew u bym pat thikna ban poi sha ka thong. Shuh shuh ula ïathuh ruh ba ka jingrai jong ka UDP ha kaba ïa dei bad u kyrtong MDC 2019 ka long khlem da don ka jingïasngewthuh jingmut hapoh ka seng ba ïatreilang ka HSPDP – UDP. “Ka rai jong ki riew rangbah ka seng UDP ban leit pynïasoh bad ka HSPDP ka dei hadien ba mih ka jingbym ïasngewthuh jingmut hapoh ka HSPDP – UDP ban pynmih tang uwei u kyrtong ban ïa khun ha ka election MDC 2019 kumba ka la paw ha ka election MLA ba la dep hynrei mynta ka kynti na ka liang ka UDP ka la dep pynmih ïa la u jong u kyrtong ban ïa khun ha ka election MDC 2019”, ong u bah B. Marbaniang.
Ha ka jingkren jong u bah Renik L Tongkhar, MLA ka Mawkyrwat uba dei ruh u Secretary ka Election Committee, u la ïathuh ba ka HSPDP kan sa pyllait ïa ka thup jong ki kyrtong MDC hapoh ka 25 tarik Naiwieng, 2018. “Ngin pyrshang ban pynkloi katba lah khnang ba ïa u kyrtong MDC na Mawkyrwat ruh yn lah ban pynbna paidbah noh.