Press "Enter" to skip to content

Khot u Dr. DD Lapang ïa ki samla ban ïakhun pyrshah ïa ka jingbiej bad jingduk

Shillong, Naiwieng, 16: U Dr. DD Lapang, uba long u Chief Adviser jong ka Sorkar Meghalaya Democratic Alliance (MDA) u la khot bad wer ïa ki samla jong ka Jylla Meghalaya, Arunachal Pradesh bad Uttar Pradesh, ba kin ïakhun pyrshah ïa ka jingbiej bad ka jingduk bad ban wanrah ruh ïa ka mynsiem jingïatylli kawei.
U Dr. Lapang u la khot la wer ïa ki samla ha ka jingplie ïa ka Reciprocal Inter State Youth Exchange Programme ba la tip kum ka ‘Ek Bharat Shrestha Bharat’ kaba la long ha Youth Hostel, Shillong.
Ïa kane ka prokram la pynlong da ka Nehru Yuva Kendra Sangathan, Shillong, kaba hap hapoh ka jingpeit jong ka Ministry of Youth Affairs and Sports ka Sorkar Indïa. Lyngba kane ka prokram, manla ki jylla jong ka ri India ki ju ïasynrop lang ban pynlong ïa kane ka jingïakynduh ban ïathir ïatai.
U Dr. Lapang u la ong ruh ba kane ka jingïakynduh jong ki samla kan pynsngewthuh kham bha ïa ka kolshor bapher bapher jong ki paidbah kiba shong basah ha kiwei pat ki jylla bapher bapher jong ka ri bad ki Union Territories ka ri Inda bad ban kyntiew ïa ka jingïasngewthuh jingmut hapdeng ki samla.
“Ka lashai ka dei ka jong phi, plie ka dohnud jong phi ban wanrah ïa ka mynsiem jingïalong shipara ha ka ri,” ong u Dr. Lapang haba kren kum u Kongsan ha kane ka sngi.
Ha kane ka sngi, ki don 50 ngut ki samla na ka jylla Uttar Pradesh bad 50 ngut na ka jylla Meghalaya kaba la wan ïashim bynta ha kane ka prokram kaba la neh khat san sngi kynthih.
Lyngba kane ka prokram, kine ki ar tylli ki jylla kin pynlong ruh ïa ki jingïathir ha kiba bun ki liang kum ha ka kam ki samla, ka science and technology, ka lariti, ka khih ka kamai bad kiwei kiwei.
Ha ka bynta kaba ar, ka kynhun jong ki 50 ngut ki samla kiba mihkhmat na ka jylla Meghalaya bad Arunachal Pradesh bad 25 ngut ki samla jong kine ki jylla kin sa leit jngoh ïa ka nongbah Lucknow, Uttar Pradesh na ka bynta 15 sngi ka ban sdng naduh ka 21 tarik, Kyllalyngkot haduh ka 5 tarik Rymphang, 2019.
Ha kine ki 15 sngi, ki samla kin sa ïohlad ruh ban ïathir ïatai ha kiba bun ki liang nalor kaba leit jngoh ïa ki jaka bakongsan kiba don ha katei ka nongbah.
Ha kane ka prokram la ïadonlang ka Anita Kharpor, Joint Secretary jong ka Sorkar Jylla Meghalaya bad kiwei kiwei ki kynrem ki lyndan.