Press "Enter" to skip to content

Pynher dorkhas u MLA sha ka DC ban pynsted ïa ka Entry/ Exit Point

Nongpoh, Naiweing, 16: Kum shi bynta ka jingang nud ban pynsted noh na ka bynta ban pyndep ïa ka khyrdop talasi mynder ne ka Entry bad ka Exit Point ha Ri Bhoi District, kaba dei kawei na ka lad ban tehlakam ia ka jingwan rung kynthep ki mynder ne ki bar jylla, na ka liang u MLA ka Nongpoh, u Bah Mayral Born Syiem hynne ka sngi thohdieng u la pynher da ka dorkhas jingdawa sha ka Deputy Commissioner ka Ri Bhoi District ban dawa pynsted ïa ki kam kiba ïadei bad ka jingpyntreikam ïa katei ka Entry bad ka Exit Point.
Kumba la pynpaw ha katei ka dorkhas ba la phah sha ka Deputy Commis sioner ka Ri Bhoi, ka Kong R.M Kurbah, u Bah Mayral Born Syiem, u la pynpaw ba ka Sorkar ryngkat ki bor synshar District ki la trei shitom ban pynurlong ïa ka jingpyntrei ïa katei ka Entry bad Exit Point ha Ri Bhoi, namar kane ka dei kawei na ka lad kaba lah ba khanglad ïa ka jingwan rung kynthep ki mynder ne ki bar jylla.
Halor ka jingdonkam ban pyndep kloi noh ïa kane ka Entry bad ka Exit Point, u MLA ka Nongpoh u la ong ruh ba u la ioh jingtip ba na ka liang ki bor ba dei peit ïa kane ka projek (Expert) ki la pyndep ruh wat ïa ka Social Impact Assesment ba la phah sha ka sorkar bad mynta ka dei ka kamram ka Sorkar ba kan pynsted noh ïa ka kam khnang ba katei ka Projek ba la mang kyrpang da ka Sorkar ban tehlakam ïa ki bar jylla kan long kaba jop bad ruh ba lada lah ban pyntreikam kham kloi kan long ka jingkhanglad ïa kino kino ki bar jylla ne ki mynder kiba thmu ban wan rung tuh sha ka jylla.
Namarkata, khnang ba kane ka projek ban tehlakam ïa ka rung ka mih laitluid bar jylla bad ki mynder ri kan long kaba jop na ka liang utei u MLA u la kyrpad jur ruh ïa ka Deputy Commissioner ka Ri Bhoi bad ruh ka Sorkar Jylla ka dei ban pynstet noh ïa kam bad ka jinglah ban pyndep kloi ïa katei ka khyrdop tehlakam ïa ki bar jylla kan iarap na ka jingthmu rung tuh ki mynder ne ki bar jylla kiba ym don kot don sla sha ka jylla.