Press "Enter" to skip to content

Pyrshah jur ka NEIPF ïa ka Citizen Bill, kwah pynbeit noh ka Megh-Assam ïa ka jingïakajia pud

Shillong, Naiwieng 16: Ka North East Indigenous People Forum (NEIPF) kala rai ban pyrshah jur ïa ka jing thmu jong ka Sorkar Pdeng ban mynjur ïa ka Citizen (Amendment) Bill 2016, ka ban plie lad ïa ki paid Hindu na Bangladesh ban wan rung hapoh ki Jylla ka thaiñ Shatei Lam Mihngi.
Ka NEIPF kaba dei ka kynhun jong ki Sengbhalang ka thaiñ NE ba ïalam da u Anup Chetia General Secretary barim ka ULFA kum u Chairman, kala shim ïa kane ka rai ha ka jingïalang jong ka Forum ba long hynnin ka sngi ha Guwahati. Ïa ka seng FKJGP ba dei dkhot ha kane ka Forum, la mihkhmat da u Bah Eldie N Lyngdoh Information Secretary lem bad u Bah Elton Warjri bad Bah Kitboklang Nongphlang.
Kane ka jingïalang kala iatai sani bha ïa kiba bun ki jingeh jong ka thaiñ Shatei Lam Mihngi ka Ri ba kynthup ruh ïa ki Polisi jong ka Sorkar Pdeng kiba long pyrshah ïa ki paid riewlum jong ka thaiñ.
Kat kum ka jingïathuh u Bah Eldie N Lyngdoh, ka Forum kala iatai sani bha halor ka Citizen (Amendment) Bill jong ka Sorkar Pdeng bad la shim ïa ka rai ban pyrshah jur ïa ka jingthmu pynlong aiñ ïa kane ka Bill.
“Ka Forum kala rai ban phah da ka jingthoh sha baroh ki Lat ka Jylla bad Myntri Rangbah jong ki 7 tylli ki Jylla ka thaiñ ban kyntu ba kin pyrshah jur ïa ka jingpynlong aiñ ïa ka Citizen Bill” ongu Bah Eldie haba ïathuh ba ka Forum kan sa leit ruh sha Nong bah Delhi ban pynpaw pyrthei ïa ka jingpyrshah jong ka ïa kane ka Bill.
Kane ka jingïalang kala iatai ruh halor ka jingjia ïakajia khappud hapdeng ki Jylla jong ka thaiñ khamtam ïa ka jingïakajia pud hapdeng ka Assam bad Meghalaya ha Block-I, II bad ha Langpih.
“Ngi la iatai sani ïa kane ka mat bad ka forum kala shim ïa ka rai ban lum shuwa ïa ka jingïalang bad baroh ki Khlieh Nongsyn shar lem bad ki Sengbhalang jong baroh ki jaidbynriew ba shong ha ki shnong khappud na ka bynta ban wad ïa ki lad ki lynti kum no ba lah pynbeit noh ïa kane ka jingeh kaba la sahteng da ki phew phew snem” ong une u Nongïalam ka FKJGP.
Kat kum ka jingong jong u, ka Forum kala kyntu ruh ïa ka Sorkar Pdeng ba kan tuklar lang noh halor kane ka kam khnang ba ka jingïakajia pud hapdeng ki Jylla jong ka thaiñ kan kut noh.
Nalor kine ki mat, ka Forum kala iatai ruh halor ka National Registration of Citozen (NRC) bala pyntreikam da ka Assam. Ka Forum kala pdiang ïa ka jingtreikam jong ka NRC hynrei kala buh pat ïa ka jingdawa ba dei ban buh ïa u snem 1950 kum u snem ot kyrteng.