Press "Enter" to skip to content

Syier thot thot ki paid Dangar-Balat ïoh hap phet shnong tang poi ka Lyiur

Shillong, Naiwieng 16 : Ka jingbteng jong ka Wah Umngi ban kyntur pud ka la pynlong ïa ki paid khappud khamtam ha ki thaiñ Dangar bad Balat ban don beit ha ka jingsyier that that ba ïoh ki ïing jong ki kin shah rong noh ha katei ka umbah tang shu poi ka aiom Lyiur.
Katkum ka jingïathuh da u Syiem jong ka Hima Bhowal, Paiem KN Syiem, ka jingkhlaiñbor ka wah Umngi ha ka por Lyiur ka poi had u pud ba da ki phew phew meter ka jaka ha shi lynter ka khappud bad ki shnong ba don ha katei ka thaiñ ban shah rong noh ha ka um.
“Ngi don ka jingsyier ba lada ym lah ban ïada noh kham kloi, kine ki jaka ba ngi ieng mynta ki lah ban shah rong noh tang shu wan ka Lyiur,” u la ong.
Da kaba kdew ïa ki ïing kiba ki nongshong shnong ki la ieh ïingjah da ka jingtieng ba ïoh shah rong noh ha ka um, u Paiem Bhowal u ong ruh ba ka jingtur jong ka um sha u pud u sam jong ka India ha katei ka thaiñ ka la nang pynlong ïa ka wah Umngi ba kan nang ïar bad nang heh katba nang ïaid ki snem.
U la ong ruh ba mynta ki nongshong shnong jong ka Dangapdop ban don ha ka jingsyier namar tang shu ïoh kyntur ka um, kitei ki jaka baroh kin sa twa lut bad bun ki longïing kiban hap ban phet shnong.
Kumta, na ka liang u Paiem Bhowal u kyntu ïa ki bor sorkar ba kin shimkhia mardor halor katei ka bynta khnang ba ki paidbah kin ym donkam ban phet shnong na la ki jaka lajong tang namar ka jingkyntur pud jong ka um.
Na ka liang ki nongshong shnong pat ki pynpaw ba kan shem jingeh haduh katta katta ïa ki ban shna biang da kawei pat ka ïing lada jia ba ka jingkyntur pud jong ka wah Umngi ka bteng ha ki snem ban wan.
Ki la iathuh ruh ba katei ka umbah ka syllad beit naphang lin la ka long naduh ki jaka rep, ki jaka ialehkai, bad khamtam eh ia ki iing ba ki shong ki sah.