Press "Enter" to skip to content

Tuklar ka MHRC ba mut pyndonkam ïa ka jaka ka Central Jail ha ka National Games

Shillong, Naiwieng 16: Ka Meghalaya Human Rights Commission (MHRC) kala shimkhia ban tuklar halor ka jingbthah jong ka Sorkar Jylla ban pynsangeh noh shuwa ïa ka jingai jaka ban tei ïa ka Central Jail ha New Shillong Township, Mawdiangdiang namar ka Jylla ka donkam jaka ban pynkhreh ïa ka National Games 2022.
Ka Commission kala hukum ïa u Chief Secretary ka Jylla u Y Tsering ba u dei ban ai jingpynshai halor kane ka kam bad ba un aiti ruh da ka kaiphod kaba bniah, kaba dei ban poi sha ka Commission hapoh ka 60 sngi.
“Ka MHRC ha ka hukum ba pynmih myn ha ka 31 tarik Risaw, kala hukum ïa ka Sorkar Jylla lyngba u Chief Secretary ba kan shim ïa ki sienjam ba dei ban shim bad ban aiti ïa kaei kaba long ba man halor kane ka kam hapoh ka 60 sngi” ong u Bah Aldous Mawlong, Secretary ka MHRC ha ka kyrwoh ba pynmih hynne ka sngi.
Ka Commission kala shim da ka suo moto case ïa kane ka kam halor ka jingmih khubor ha kawei ka kot khubor phareng (kaba la mih ruh ha u Mawphor,) kaba ong ba ka Sorkar kala pynsangeh ïa ka jingshna ïa ka Central Jail ha Mawdiangdiang namar ïa ka jaka bala aiti ban shna ïa ka Jail yn pyndonkam noh na ka bynta ka National Games.
Lah ban kdew hangne ba u Director General of Police (DGP) ba shipor ka Jylla u RP Agarwal ula pyntip ba ka tnad Urban Affairs kala dep ithuh ïa ka jaka ban ai sha ka Tnad kam pohïing ka Jylla ba kan tei ïa ka Central Jail ha NST hynrei ka Sorkar Jylla dang shen kala shim ïa ka rai ban pyndonkam hi noh ïa kane ka jaka na ka bynta ban pynkhreh ïa ka National Games-2022.
Une u Heh Pulit ula pyntip ruh ba ka Tnad kam pohïing ka Jylla mynta ka dang wad ïa ka jaka ba thymmai na ka bynta ban shna ïa ka Central Jail (phatok) ka ban set thik tang ïa ki Nongleh bymman bala shah rai pynrem (Convict) khnang ba kin nym ïoh ïakhleh lang shuh bad ki koidi kiba don hapdeng ka jingshah tian bishar (Unter Trial Prisoner), kiba la shu phngian mynta ha kylleng ki District Jail ka Jylla..
Kat kum ka jingong une u Heh Pulit, ka Jylla Meghalaya haduh mynta kam pat don satia ïala ka jong ka Central Jail kaba dei ban set tang ïa ki nongleh bymman bala shah rai pynrem ha ki Ïingkashari. U ong “Ngi kwah ban don noh la ka jong ka Central Jail khnang ba ngin lah phiah noh ïa ki nongleh bymman bala pynrem da ka kashari (Convict) bad ki koidi namar haduh mynta ngi dang don tang ki District Jail bala set lang ïa baroh”.
Haba kylli, u Agarwal uba dei ruh u Director General of Prison (DGP), ula ong ba ka Tnad kala kyrpad ïa ka Sorkar Jylla ban ai jaka ba heh kumba 25 acres eiei na ka bynta ka Central Jail haba bynrap ba kane ka Project kan donkam la kumno kumno ruh ïa ka jingmang tyngka ba kot T. 50 klur.
Haba sot ïa ka kaiphod, ka MHRC kala ong ba u RP Agrwal ula pyntip ba haduh 460 ngut ki koidi la set ha Shillong District Jail kaba dei ban ngiam tang 170 ngut bad ong ruh ba kane ka phatok kala khapngiah bha ha kaba la don ruh ka jingpyrshang ban pyn dep noh kham kloi ïa ka Nongstoin Jail ban lah pynkynriah noh ïa kumba 100-200 ngut ki koidi.
Ka MHRC kala pynpaw ïa ka jinglyngngoh ba ïa ka jaka bala tyrwa ban shna ïa ka Central Jail la ai pyndonkam noh sha ka National Games 2022. Ka ong “Kane ka dei ka kam kaba sngewkhia bha bad ka dei ruh ka kam ba pynkheiñ ïa ka hok longbriew jong ki koidi jong kane ka phatol la ka dei ki nongleh bymman bala shah rai pyndem, ki koidi ba dang don ha ka jingbishar ne ki koidi kiba dei na kawei pat ka Ri”.
U Bah Aldous u ong ba ki Dkhot ka MHRC bala khlieh da u Dr Justice Aftab Hussain Saikia kum u Chairperson lem bad u DGP (Prison) RP Agarwal, kila leit ban jurip ïa ka jinglong jingman jong ka Shillong Jail myn ha ka 15 tarik Lber mynta u snem.
“Kawei na ki jingai jingmut ka long ba ka Sorkar ka dei ban shimkhia noh mardor ha kaban shna shuh shuh ïa ki Barrack/ Building ban kham pynsting ïa ka jingeh kaba mih na ka jingset bunpaid palat” ula ong.
Nalor kane, une u Secretary ka Commission ula ong ruh ba ka Ïingkashari Supreme Court ha ka 25 tarik Nailur, kala dep thung ïa ka Committee ki laingut ki Dkhot bala khlieh da u Justice Amitava Roy, Judge barim ka Supreme Court, ban wad bniah bad ai jing mut ïa ki sienjam haba ïadei bad ka jingpynkylla ïa ki rukom treikam jong ki phatok hapoh ka Ri.