Press "Enter" to skip to content

Diaw U CM ba jot ki surok ka Mawkynrew

Shillong, Naiwieng, 18: U Myntri Rangbah ka Jylla, u Conrad K. Sangma, u la pynpaw ïa ka jingsngewkhia bad ka jingdiaw mynsiem haba ïohi ïa ka jingjot rathai ki surok ha ka jingleit iuhkjat jong u hynin ka sngi saitjaiñ ha ka shnong Mawkynrew Constituency.
“Nga sngewkhia haduh katta katta bad nga sngewsih ban ïohi ïa ka jingsahdien jong kane ka thaiñ ha ka ïoh ka kot bad khamtam ha kaba ïadei bad ka surok,” ong u Conrad K. Sangma ha ka jingleit iuhkjat banyngkong eh jong u kum u Myntri Rangbah ka Jylla ban plie paidbah ïa ka 2nd Mawkynrew Cup Football Tournament 2018-19 ba la pynlong ha ka shnong Jatah Lakadong hynnin ka sngi saitjaiñ.
“U Bah Banteidor u ju ïasyllok borabor bad u Symbud Myntri Rangbah uba bat ïa ka tnat PWD bad ïa nga ruh kumjuh. Nga ngeit ba ka jingthmu jong u (Bah Banteidor) ban khot sngewbha ïa nga sha kane ka jaka ka long ba ngan ïohi hi dalade, namar ka jingsngewkhia jong u, ïa ka jingsahdien ka thaiñ khnang ba nga dup sakhi ruh ïa ka jinglong jingman ki surok,” ong u Conrad.
“Nga kwah ban ïathuh ïa phi (ki paidbah ka Mawkynrew) ba u MLA jong phi, ma nga u Myntri Rangbah bad u Symbud Myntri Rangbah ngin sa shimkhia ban pynbna ïa ki surok jong ka thaiñ Mawkynrew,” la ai jingkular u Conrad Sangma hakhmat ki paidbah kiba wan sakhi ha kane ka sngi.
“Ka Mawkynrew ka donbok haduh katta katta ban ïoh ïa u Bah Banteidor kum u MLA uba ym tang ba u sngewkhia ïa ki paidbah ka Constituency hynrei uba don ka jingkitkhlieh ïa ka Jylla bad uba kitkhia ruh ïa ka kam kaba la bynshet bad pynpaw ba u ju angnud ban ïohi ïa ka jingkiew irat ka jylla,” ong u Conrad bad ong ruh ba u Bah Banteidor Lyngdoh uba dang shu shah jied kum u MLA mynta dang kumba 7 bnai eiei u la lah ban leh bun ki kam pynroi ha ka Mawkynrew Constituency.
U la ïaroh ruh ïa u Bah Banteidor uba la trei shitom bha ban pynïoh ïa ka song pisa kaba 300 klur na ka Ministry of Socïal Justice and Empowerment na ka bynta ban tei ïa ka National Stadium ha ka shnong Mawdïangdïang, New Shillong na ka bynta ban pynlong ïa ka National Games ha u snem 2022 ha kane ka Jylla Meghalaya.
Ha kane ka sngi, u Myntri Rangbah u la pyllait paidbah ruh ïa ka kali Ambulance ba la thied na ka MLA Scheme SRWP.