Press "Enter" to skip to content

Ap jingma ïa ki constituency ST lada pathar pynrung kyrteng thep vote : MDC

‘77 hajar ngut naei yn ïoh briew hapoh lai bnai’
Shillong, Naiwieng 19 : U MDC ka Nongthymmai, Bah Latiplang Kharkongor u la ong ba ka jingbuhthong jong ka tnad Election jong ka jylla ban pynrung kyrteng thep vote thymmai haduh 77,000 ngut hapoh u Kyllalyngkot kadei ka kam kaba lah ban buh jingma ïa ki constituency ba dang duna kiba shong khleh ki jaidbynriew ne ST constituency.
Katkum ka jingïathuh jong u Bah Latiplang, ka ophis u Chief Electoral Officer ka Meghalaya dang shen ka la pynbna lyngba ki lad pathai khubor ba ki buh thong ban ïoh pynrung kyrteng thymmai haduh 77,000 ngut ki nongthep vote hapoh jong u Kyllalyngkot, 2019, kata shwa ka elekshon Lok Sabha.
“Naei yn ïoh
haduh 77,000 ngut ki nongthep vote thymmai tang ha kine ki ar – lai bnai. Kane ka rukom khot ka long kumba pynshlur ïa ki briew kiba nabar ban wan pynrung kyrteng,” u la ong haba kren bad ki lad pathai khubor. Kumta halor kane, u la ong ruh ba ka tnad Election kadei ban ïoh ruh ïa ka jingpynshisha na ki Rangbah Shnong ha shwa ba ka tnad kan pynrung ïa kito ki briew ha ka thup kyrteng ki nongthep vote ka jylla.
Nalorkata, u ong ruh ba katei ka tnad kam dei ruh ban pynrung kyrteng pathar tang ba la pynbiang ïa ki syrnod ne ki ID Card hynrei ruh donkam wat ka jingpynshisha na ki pulit.
Halor kane, u Bah Latiplang u la ong ruh ba shen un sa thoh sha utei u heh ka tnad Election khnang ba katei ka rukom pynrung kyrteng thymmai kan long kaba pyrkhing bad ruh ban da ïoh ïa ka jingpynshisha na ki rangbah shnong halor ka shong ka sah jong kitei ki briew. “Hap ban ai jingmut ruh ba kam pat biang satia tang ka Identity Card hynrei donkam ka jingtreilang jong ki bor shnong khnang ba ki briew kiba nabar kin ym ïoh satia ban pynrung kyrteng pathar,” u la ong bad bynrap ba lada ailad kan ym shimpor ba ki ST Constituency kin sa jah bad ki nongrai ïa ka jop ka rem jong ki kyrtong kan shong ha ki briew kiba nabar.
Kumba long mynta ki dang don tang saw tylli ki constituency ha ka jylla, kata ka Pynthorumkhrah, ka Shillong South, ka Phulbari bad ka Rajabala kiba la shah ñiew kum ki General Seat ne ki constituency ba la jur bha ka ïa shongkhleh jaidbynriew.