Press "Enter" to skip to content

Byrngem ban shah thngan paidbah lada ym weng noh ïa u Lyngdoh Hima Sohïong

Puk tur ki paid Sohiong sha KHADC
Shillong, Naiwieng 19 : Ki nongshong shnong ka Hima Sohïong ki la byrngem ban pynlong da ka jingshah thngan paidbah ha phyllaw jong ka Khasi Hills Autonomous District Council (KHADC) lada ka Council kam lah ban weng noh ïa u Lyngdoh ka Hima Sohiong hapoh ka shitaiew.
Kitei ki paidbah kiba wan na kylleng ki shnong jong ka Hima Sohiong bad khambun na Krang Pyllun ki la pynpaw ba katei ka jingdawa jong ki kadei namar bun ki kynrum kynram kiba mih ha shnong ha thaw tang namar ka rukom treikam jong utei u Lyngdoh.
Hadien ka jingkynduh ïa u Chief Executive Member (CEM), Bah HS Shylla kumjuh ïa u EM ka tnad Elaka, Bah James Sylliang, kitei ki rangbah ki la pynpaw ba kim pat hun satia ïa ka jubab ba ki ïoh. Hynrei dei hadien katto katne por ba la wan mih u Bah James Sylliang ban kren sha ki paidbah da kaba kular ba ka Council hi kan sa shim ïa ka rai kaban pynhun ïa u paidbah ba bun. U EM u la kular ruh ba hadien ba la kut ka Dorbar Tlang, ka Council kan sa shim ïa ka rai kaba ïadei bad ka jingdawa jong ki.
Shwa kane haba kren bad ki lad pathai khubor, u President ka Synjuk ki Sordar Shnong Krang Pyllun, Bah Lembarkos Stepwar, u la ong ba ha Krang Pyllun ka shnong kaba dong tang kumba 400 tam tylli ki longïing ka don pat haduh kumba 11 ngut ki Sordar Shnong kiba pynïaid shnong lyngba ka jingpynkupbor u Lyngdoh.
Katkum ka jingïathuh jong u President ka Synjuk, ka jingai Sanad pathar jong u Lyngdoh sha kat ki briew ba kwah long Sordar ha katei ka shnong ka la buh jingeh haduh katta katta wat haba don ka ïap ka im, bad wanrah ka jingbym sngewthuh jingmut ha shnong ha thaw namar kitei ki Sordar ki lah ban synshar tang ïa ki khlieh briew ym ïa ka shnong.
La kynnoh ruh kino kino kiba lah ban ïoh tang 20 haduh 25 tylli ki longïing ki la lah ïoh suk ïa ka Sanad ban synshar kum ki Sordar. Hadien kane, u ong pat ba lada ka KHADC kam ai ïa ka rai hapoh ka shi taïew kumba la kular da u Myntri, kin pynlong da ka jingshah thngan paidbah ha phyllaw ka Council.