Press "Enter" to skip to content

Ka BJP ka dei ban sei la u Kyrtong sha ka Elekshon MP: Hek

Shillong, Naiwieng 19: U Nongïalam ka Bharatiya Janata Party (BJP) Bah A.L.Hek uba dei ruh u Myntri ha ka Sorkar Meghalaya United Alliance (MDA), ula ong ba ka BJP ka dei ban sei ïala ki jong ki Kyrtong sha ka elekshon MP-Lok Sabha na baroh artylli ki Parliamentary Constituency ka Jylla.
“Ka BJP kum ka National Party ka dei ban pynïeng la ki jong ki kyrtong” ong u Bah Hek haba iakren bad ki Nongthoh khubor hynne ka janmiet haba pynpaw pat “Ka rai ba khatduh ïa kane ka kam ka shong eh ha ka Party High Command na Delhi”.
Kat kum ka jingong jong u, “Lada ka Party High Command ka ong pynïeng kyrtong ngin hap ban pynïeng kyrtong hangne hynrei lada kam kwah, ngi lah ban kyrshan ïa u kyrtong iamonlang ka MDA”.
Haba pyntip ba ka Party BJP haduh mynta kam pat shong jingïalang satia ban iakren halor ka jingpynïeng kyrtong sha ka elekshon MP, u Bah Hek ula ong “Baroh ki Nongïalam ki dang iabunkam bad pynleit jingmut sha ka elekshon ha Jylla Mizoram. Hadien kane ka elekshon ngin sa shong bad sa shim ïa ka rai”.
Haba kylli ïa ka jingtyrwa jong ka Kynhun MDA ban sei da u kyrtong iamonlang, u Bah Hek ula ong “ Ka Coordination Committee jong ka MDA kala iakren ïa kane ka kam bad kala aipor shibnai ïa ki Seng Saiñ Pyrthei ba kin pyntip lada kim pynïeng kyrtong ha kane ka elekshon”.
“Lada ki Seng Saiñ Pyrthei ki thmu ban sei ïala u kyrtong, kan don jingmut aiu ban rah iakren ha ka Committee” ula ong.
Haba kylli pat ïa ka jingpynkhreh jong ka BJP ïa ka elekshon MDC-2019, une u Nongïalam ula ong ba ka party hi kala dep aibor ïa ki katto katne ki Mandal ba kin khot application ïa ki kyrtong kiba kwah aireng na ka BJP bad kane ka long tang ïa ki katto katne ki Mandal.
Haba kylli ba hato ka BJP kam don jingthmu ban sei kyrtong na baroh ki Constituency, u Bah Hek ula ong “Kane ka shong ha ka Party ban batai ym ma nga”.