Press "Enter" to skip to content

Kyrmen u Dr Lapang ba ka rai i’u kyrtong monlang kan long ka jingskhem ka Sorkar MDA

Shillong, Naiwieng 19: U Myntri Rangbah barim ka Jylla bad Chief Adviser ka Sorkar Jylla Dr.D.D.Lapang hynne ka sngi ula pyn paw ïa ka jingkyrmen ba ka kynhun synrop MDA kan phaikhmat sha ka jingskhem jong ka Sorkar Jylla haba shim rai ïa u Kyrtong Iamonlang sha ka elekshon MP-Lok Sabha 2019.
“Nga kyrmen ba kin rai ïa kaba bha tam na ka bynta ka jingeh bad jingskhem jong ka Sorkar ba mynta” ong u Dr Lapang haba iakren bad ki Nongthoh Khubor hynne ka janmiet.
Ka Meghalaya Democratic Alliance (MDA)-Coordination Committee ba kynthup ïa 6 tylli ki seng saiñ pyrthei, ka dang shong bishar mynta ïa ka jingtyrwa ban sei da u Kyrtong Iamonlang sha ka elekshon MP-Lok Sabha ban long ha u snem ban wan.
Napdeng kine ki 6 tylli ki Party ka United Democratic Party (UDP) kaba wan ba-ar ha ka jingbun paid hapoh ka kynhun MDA, bad ka Hill State People’s Democratic Party (HSPDP), kila dep pynbna ïala ki kyrtong na ka Shillong Parliamentary Constituency, kiban sa wanrah hakhmat jong ka Coordination Committee ka MDA.
Ka UDP kala jied ïa u MLA barim ka Nongthymmai Dr Jemino Mawthoh kum u kyrtong ka Party katba ka HSPDP kala rai ban pynïeng ïa u Bah Renikton Lyngdoh Tongdhar u ba dang jop ïa ka elekshon MLA ha ka sien ba nyngkong eh na Mawkyrwat.
Haba twad jingmut halor ka jingpyrkhat ban sei da u Kyrtong Iamonlang, une u Nongïalam saiñ pyrthei bala rangbah bha, ula kyntait ban kynthoh ïa kane da kaba ong “Ngam shym la iadonbynta ha kane ka kam bad ngam kwah ban tuklar ïa ka haba ngam shym la ïoh la lad ban ïasyllok bad ki bad ban iadonlang ha ka Committee jong ki khamtam mynta lei ba nga dang don shabar”.