Press "Enter" to skip to content

Sangeh ka ksam marpoh khyndew ha u pud KHADC : Maham u EM ïa ka GSI

Shillong, Naiwieng 19 : Ka Khasi Hills Autonomous District Council (KHADC) ha ka sngi Nyngkong ka la maham ïa ka Geological Survey of India (GSI) ba kadei ban sangeh shi syndon ka jingleit ksam marpoh khyndew hapoh u pud u sam jong ka Council lada kam pat ïoh ïa ka jingai jingbit (No Objection Certificate) na ka.
“Khlem ka jingïoh jingbit na ka Council, ka GSI kadei ban sangeh shisyndon ïa ki jingthmu leit ksam nuksa ïa ki marpoh khyndew kiba don hapoh u pud u sam jong ka KHADC,” ong u Executive Member ka tnad Land, Mines and Mineral, haba kren bad ki lad pathai khubor.
Katei ka jingmaham jong u EM kadei hadien ba katei ka tnad kam ju pan jingbit satia hynrei ka
shu pyntip ba ka pynlong ïa ka jingjurip marpoh khyndew ha ki jaka jong ka. Shuh shuh u la ong ruh ba na ka por sha ka por ki la ju pyntip wat ïa ka tnad Atomic Mineral Directorate (AMD) ba kim dei satia ban ksam nuksa Uranium ne marpoh khyndew khlem da ïoh jingtbit shwa na ka Council
U EM u la ong ruh ba u pyrshah jur halor ka shithi kaba wan na ka GSI kaba ong ba ka koiphod halor ka jingjurip ne ksam nuksa ïa kitei ki marpoh khyndew dei ban phah tang sha ka sorkar jylla bad ym dei satia ban phah sha ka Council.
“Kumta kumba ki la kdew hajrong, ïa katei ka shithi ba ka GSI ka phah ym lah satia ban pdiang. Ki lah ban phah biang ïa ka aplikeshon ban ïoh ïa ka NoC sha ka Executive Committee lyngba u Chief Executive Member lane u Executive Member jong ka tnad,” u la ong da kaba bynrap ba ka GSI ka hap ban pyntikna ruh ba kin hap ban phah lut ïa ki kaiphod ba ki ïohlum haba ïadei bad katei ka jingksam nuksa marpoh khyndew na jaka jong ka KHADC.
Ha kajuh ka por u la kdew ruh ba ka rukom thoh ïa ka shithi sha u khlieh duh jong ka KHADC kadei ban long kaba beit ym ban thoh kulmar ïa ka kyrdan jong u. Nalorkata, utei u EM u la pyni ba ha katei ka shithi ba la phah da ka GSI, la thoh Chief Elected Member ha ka jaka ban thoh Chief Executive Member.