Press "Enter" to skip to content

Shuwa Khristmas ne Snem Thymmai yn sdang pyntrei biang ïa ka MHIS-IV ha Jylla

Lah ban pyntrei ka kompani Reliance Insurance
Shillong, Naiwieng 19: Ka Sorkar Meghalaya Democratic Alliance (MDA) kala buhthong ban sdang pyntrei noh ïa ka Meghalaya Health Insurance Scheme-IV (MHIS-IV) kaba khlem lah pynbteng mynta la bun bnai na ka MHIS-III, hashuwa ka jingrakhe Khristmas ne ha u snem Thymmai.
Ka kompani Reliance General Insurance Company Limited ka lah ban shimti ha kaban pyntreikam ïa kane ka skhim hadien ba kala shah jied kum ka kompani kaba thong rit duh ka pisa haka Financial Bid bad ba biang duh ha kaTechnical Bid ha ka jingiakhun ïa ka Tender ban pyntrei ïa ka skhim ha Jylla.
“Ngi la buhthong ban sdang pyntrei biang ïa ka MHIS hashuwa ka taiew lehkmen Khristmas ne ha ka taiew ba nyngkong jong u snem thymmai” ong u Bah A.L.Hek, Myntri ka tnad ka Koit ka Khiah ka Jylla haba iakren bad ki Nongthoh khubor hynne ka janmiet.
Kat kum ka jingong u Myntri, haduh 7 tylli ki kompani kila thep tender ban iaknieh pyntrei ïa kane ka skhim ha Jylla hynrei hadien ka jingplie ïa ka Tender (Tehnical/Financial Bidding), ka kompani Reliance General Insurance Co Ltd ka dei kaba la thong rit duh ka pisa kaba long tang T. 1630 ka premium ïa kawei pa kawei ka Longïing ha Jylla. “Baroh ki kam kila dep lut nadong hadong bad kaba sah mynta ka dei satang ban ai ïa ka Work Order sha ka kompani” ong u Bah Hek.
Lah ban kdew hangne ba ka Sorkar Jylla kala pynsangeh ïa ka jingtreikam jong ka MHIS naduh ka 1 tarik Risaw 2018 hadien ba kut noh ka por treikam jong ka MHIS-III. Kane ka jingpynsangeh ïa ka MHIS-IV ka dei namar ka jingpan dor heh palat jong ki kompani kiba kwah ban pyntrei ïa kane ka skhim.
Haba pyntip ba ka MHIS-IV mynta kan treikam ryngkat ryngkat bad ka skhim ka Sorkar Pdeng ka Ayushman Bharat-Pradhan Mantri Jan Arogya (AB-PMJA), u Myntri u ong “ Kumba 4 lak tylli ki Longïing kin ïoh jingmyntoi na ka skhim Ayushman Bharat bad 8 lak tylli kin shah kdup ha ka MHIS-IV” haba bynrap “Ki Longïing kiban shah kdup ha ka Ayushman Bharat kin dei tang kito ki longïing baduk hynrei ka MHIS kan kdup lut ïa baroh lait noh ki Nongtrei ka Sorkar Jylla bad Sorkar Pdeng”.
Haba kylli ïa kaei ka synniang jong ki Longïing ban ïoh ïa kane ka skhim, u Myntri ula ong “ Ka synniang kan long tang T. 100 shi ïing bad kane ka pisa ka dei na ka bynta ka bai leh Registration, bai shna ïa ka MHIS Card kaba paka bad kiwei kiwei”.
Kat kum ka MHIS-IV bad kumjuh ruh ka Ayushman Bharat, ka Health Insurance na ka bynta ki Longïing ka Jylla kala kot sha ka T. 5 lak shi-ing na ka T. 2.80 lak jong ka MHIS-III bala kut noh. Kane ka skhim thymmai kan nym don pud ne buh kyndon naka jingdon briew ha ki Longïing Longsem kumba long ka skhim barim hynrei kan kdup lut ïa baroh kat kiba don ha kawei pa kawei ka Longïing Longsem.