Press "Enter" to skip to content

Thmu ki MDC ban pynkhyllem CEM noh ïa u Bah HS Shylla

Shillong, Naiwieng 19 : Watla ka elekshon MDC ka sah sa tang kumba lai bnai ei ei hynrei ki don pat ki MDC kiba thmu ban pynkhyllem noh ïa ka Exeutive Committee ba ïalam da u Bah HS Shylla kum u Chief Executive Member.
Haba pyntikna ïa kane, u CEM u la kubur ba ki la don ki MDC kiba pyntip ïa u ba u Bah PN Syiem, CEM barim u thmu ban pynkhyllem noh ïa katei ka kynhun kaba u ïalam. “Haba nga kylli pat na ki MDC khamtam kito kiba shong ha ka jingïalang jong ka Executive Committee ki la pynpaw ba kim tip ei ei shaphang kata,” bynrap biang u Bah Shylla. La ïathuh ruh ba ha ka jingïakren, na ka liang ki MDC ka UDP ki la pynpaw ba ki skhem beit, kumjuh na ka NPP, HSPDP, bad ruh na ki saw ngut ki MDC shimet kiba la resaiñ dang shen na ka PDF.
Hadien kane u CEM u la ïathuh ba u la phone ruh ïa u nongialam ka PDF, Bah James Ban Basaïawmoit, hynrei utei u rangbah ruh u kyntait ba kin don kum kata ka jingmut khamtam haba ka elekshon MDC ka la jan.
Watla utei u hehduh ka Council u pynpaw ba u long uba kloi ban ailad lada ki MDC kim mon shuh ban kyrshan ïa u, hynrei u dang sahnud pat ïa ka Clan Bill kaba dei ka aiñ kaban pynkupbor kyrpang ïa ki Kur, ïa kaba la thmu ban rah bad mynjur ha ka Dorbar Tlang kaban sdang ha kane ka sngi Ba-ar.
Shwa kane, u Bah Shylla u la ïathuh ba kitei ki MDC ki la ïathuh ba u Bah PN Syiem u la khroh ruh ïa ki ba kin treilang bad u khnang ba kin lah ban pynkhyllem noh ïa ka Executive Committee kaba mynta. Haba ïa kren pat bad bun ki MDC ki la pynpaw ba kim kwah shuh ban dang bunkam ha ka jingpynkhyllem CEM namar ka por ka la dei ba kin pynleit jingmut ha ki constituency khamtam haba ka elekshon ka la sah satang khyndiat bnai.