Press "Enter" to skip to content

Wat shu sngap haba jia ki kam runar pyrshah ïa ki kynthei bad khynnah: Adelbert

Shillong, Naiwieng, 19: “Wat shu sngap haba jia ki kam runar ruser pyrshah ïa ki kynthei bad khynnah,” ong u Bah Adelbert Nongrum, MLA ka North Shillong Constituency haba kren kum u Kongsan ha jingïathir kaba shi sngi halor ka phang ‘ban pynkut noh ïa ka jingshah thombor ki khynnah (End Violence against Children) ïa kaba pynlong da ka World Vision ha Brookdene Hall, Shillong ha ka sngi thohdieng jong ka taiew baladep.
U Bah Adelbert ula ong, “kane ka thong, kam dei tang ka bynta jong ka World Vision, hynrei ka dei ka thong jong ngi iwei pat iwei bad ka dei ka kamram jong ka Jylla bad ka pyrthei hi baroh kawei.”
U la ai khublei ïa ka World Vision kaba la shim ïa kane ka sienjam ailad ïa ki nongïashim bynta ban kren ïa ka jingpynsngew jong ki bad ym ban shu long tang kum ki nongpeitkai ha kum kine ki ishu kiba ktah ïa ka imlang ka sahlang. U la ong ruh ba ki don lai jait ki briew ha ka imlang ka sahlang, kaba nyngkong, don katto katne ki briew kiba leh ïa ka kam, kaba ar, don kiba shu long tang ki nongpeitkai, kaba lai, don pat ki bym ju bna eiei ïa kaei kaba jia ha ka imlang ka sahlang. “Ka jingkwah ka dei ka jong ngi, kiba kumno ki briew ngi kwah ban long,” ong une u MLA ka North Shillong.
U Bah Adelbert ula khot bad wer ruh ïa ki nongïashim bynta da kaba shna ïa ka jingkieng ym da ka kynroh ban ïasnohkti lang kawei ban ïakhun na ka bynta ka jingthmu kaba bha.
Ka Kong Amanda Pakynteiñ, kaba la long kum ka Symbud Kongsan ha kane ka sngi, ka la ai ïa ka jingkren da kaba sot na ka Kospel u Matheus 9:13-15..
Ka jingthmu haba pynlong ïa kane ka jingïathir ka long ban ai jingpynshai bad jingpynsngewthuh khnang ban pynkut noh ïa ki kam thombor pyrshah ïa ki khynnah rit khnang ba kin dup lah ban ïoh ïa ka hok jong ki.
I Kong Meena Kharkongor, Chairperson ka State Commission for protection of Child Rights haba kren halor ki lad jingïada ïa ki khynnah na ki jingshah leh be-ijot i la pynshai sha ki nongïashim bynta katto katne ki kyndon aiñ jong ka Protection of Children from Sexual Offences (POCSO) Act, 2012. I la kren janai ruh halor ka State Juvenile Police Unit (SJPU), POCSO Act bad ïa ki shnat treikam ka Sorkar kiba ju ïarap ïa ki khynnah haba ki mad ïa kino kino ki jingshah thombor ha ka longryngieng jong ki.
Ha kane ka sngi la ïoh jingkren ruh na u Bah Paul Wahlang, uba long u District Child Protection Officer bad na i Kong Bertha Dkhar, Principal ka Bethany Society bad ka Kong Catherine kaba la mihkhmat ïa ka North East Network.