Press "Enter" to skip to content

Hiar u Myntri Rangbah sha Mizoram ban ïalap election ïa ka NPP

Shillong, Naiwieng 20 : U Myntri Rangbah ka jylla uba dei ruh u National President jongka NPP u Conrad K Sangma u la hiar mynta ka sngi sha Mizoram ban ïalap election na ka bynta ka party NPP ha katei ka jylla.
Un leit ban ïalap election ha Vairengte, Kolasib, Kawnpui, Serchhip ha kine ki lai sngi ba un don ha Aizawl. Ka NPP ka ïa khun tang na ki 9 tylli ki constituency ha Mizoram.
“ Ka NPP ka la trei tyngeh bha ha ki jylla bapher bapher kane ka thaiñ ban pynurlong ia ka jingthang jong u nongseng jong kane ka party u (L) P.A Sangma ba kan long ka party kaba khlaiñ na kane ka thaiñ bad ha ka ri hi baroh kawei. Ngi don ka jingkyrmen ba ka NPP kan ïoh ïa ka jingjop ha kine ki constituency ba ka ïakhun bad kan long ka party ka ban donkam bha lada jia ba ym donn ba ïoh ban thaw sorkar” ong u Conrad.
U la ïathuh baka party ka pynïeng kyrtong ruh tang na kito ki constituency kiba ka sngewthuh ba ka don ka jingkyrmen ban jop. “ Ngi dang dei ka party thymmai bad ngi kwah ban ïoh phrung khlieh ha Mizoram kumta ngi kyrmen ba na kine ki constituency ba ngi ïakhun ngi don ka jingkyrmen skhem ban jop” ong biang u Conrad.
U la ong “ Kum ka party ngi don la ka jong ka nongrim treikam. Ha kane ka election ngim shym la ïatrei lang bad no bad no ruh hynrei hadien ka election ngin sa peit ban ïatrei lang bad kano kano ka party na ka bynta ka jingmyntoi jong ki paidbah. Kane ka election kan long ka jingsdang jong ka party ban seng nongrim ha Mizoram” ong u National President ka NPP.
U Myntri kam pohiing ka jylla u James K Sangma ruh mynta u don sha Mizoram ban ïalap election ïa ka NPP.