Press "Enter" to skip to content

Hukum ka sorkar ïa ki bor district ban pynshitom ïa kiba tih bad khaïi dewiong tuh

Shillong, Naiwieng 20 : U Deputy Chief Minister jongka jylla u bah Prestone Tynsong u la ïathuh ba ka sorkar jylla ka la bthah ïa ki bor synshar district ba ki dei ban pynshitom da kaba tyngeh ïa kino kino kiba tih bad khaïi dewiong beaiñ ha ka jylla.
“ Ka jingshisha ka long ba ka sorkar MDA ka shim khia bha ïa kane ka kam bad la hukum ïa baroh ki bor synshar district kata naduh ki DC bad SP ba kin long peitngor bad pynshitom da kaba tyngeh ïa kito kiba pynkheiñ aiñ da kaba bteng ïa ka jingtih bad khaïi tuh ïa u dewiong” ong u bah Prestone
U bah Prestone u la kyntait ruh ïa ka jingkynnoh jongka Congress ba ki don kita ki heh saiñ pyrthei ha kane ka sorkar kiba donkti bad ki nongkhaïi tuh ïa u dewiong.
“ Nga kyntait war ia kine ki jingkynnoh jong ki Liang Pyrshah. Ka ju long ka rukom hi ba kin pynmih ïa kum kine ki jingkynnoh namar ka dei ka kamram jongki ban shu kynnoh beit ba kane ka sorkar ka donkti bad kata ka kam khaïi dewiong tuh” ong biang u bah Prestone.
U la ong naduh u snem 2014 ba la khang ïaka jingtih bad khaïi dewiong da ka NGT ki don ki case ba ki pulit bad ki magistrate ki ïoh bat ïa ki trok ba kit tuh ïa u dewiong.
“ Lada ka long kumta ha kato ka por haba ki shah bat bad shah kem ka mut ba ka sorkar ruh ka ïadon kti ban khaïi dewiong tuh namar ha kato ka por la ïalam ïa ka jingsynshar da ka Congress hi” ong u bah Prestone.
U la pynpaw ba kam long kaba dei ban shu kynnoh ïa ka sorkar MDA bad u sngew phylla balei ba u nongpathai khubor ka Congress u bah H.M Shangpliang u ïai kren bad kynnoh beit ïa kata ka jingïadon kti namar ha kato ka por kata 2014 u dang dei u ophisar jongka sorkar.
Ka la mih ka jingdawa ban thung jingtohkit ka sorkar halor kane ka kam khaïi dewiong tuh khamtam hadien ka jingshah thombor ka kong Agnes Kharshiing bad ka Amita Sangma ha ki suba khaïi dewiong tuh ha Sohshrieh, East Jaintia Hills. Halor kane u Dy CM u la ong ba ka sorkar kan sa bishar bniah tangba la ka long kumno kumno ruh ka sorkar ka shim khia bha ïa kane ka kam.