Press "Enter" to skip to content

Lap ki Seng ba ai syrnot u RS Pyrdiwah ïa 41 ngut ki mynder ri na Bangladesh

Shillong, Naiwieng, 20: Ka Federation of Khasi Jaiñtia and Garo Peoples (FKJGP) Riwar Mihngi bad ka Khasi Students Union (KSU) Border Unit ki la kam ba ki la lap ba ki don 41 ngut eiei ki mynder ri kiba lah ban shu wan na Bangladesh ki la ïoh syrnot na u Rangbah Shnong ka shnong Pyrdiwah, East Khasi Hills District kaba don markhap bad ka ri Bangladesh.
Ha u kyrwoh ba la phah mynta ka sngi baar, u Bah Evanfield Khonglam, u Information Secretary bad u Thawthymmai Suting u President ka KSU Border unit, ki la hiar sha shnong Umsyiem dang shen ban jurip ïa ka jingshah bishar ne Public Hearing jong ki mynder ri ban ïoh pynrung kyrteng ha ka Electoral Roll jong ka Jylla Meghalaya.
Kine ki sengbahlang ki la lap ba ki don kumba 41 ngut ki mynder ri ba suba ki dei kiba wan rung na ka ri Bangladesh, ki la wan ban shah bishar.
“Kine ki mynder ri ki ïoh tang ka syrnot nongshong shnong na u Rangbah Shnong ka Pyrdiwah khlem don kiwei kiwei pat ki kot,” la ong u Bah Evanfield.
U la ong ba kine ki mynder ri ki la kam ba ki dei ki nongshong shnong ka r India tang da kine ki syrnot ba la ïoh na u Rangbah Shnong ka Pyrdiwah bad halor kane, kine ki ar seng ki la pynsangeh noh ïa baroh kitei ki mynder ri ban pynrung kyrteng kum ki nongthep vote.
Na ka liang kine kine ki ar seng ki la maham tyngeh ïa ki Rangbah Shnong ba kim dei ban leh kulmar da kaba ai syrnot (certificate) pathar khlem da bishar bniah na ki kot ki sla bad ka jinglong trai shnong jong ki bar jylla bad khamtam eh ki mynder ri.
Ki ar seng ki la byrngem ban leh da kaba tyngeh ïa kum kitei ki Rangbah Shnong da kaba leit ujor sha u Chief Executive Member (CEM) ka Khasi Hills Autonomous District Council (KHADC) ba un leh eiei halor kane.