Press "Enter" to skip to content

Mynjur ka KHADC ïa ka Resolution ban pynphai biang ïa ka Block-I, II sha Meghalaya

Shillong, Naiwieng 20: Ka Khasi Hills Autonomous District Council (KHADC) hynne ka sngi kala mynjur ïa ka Resolution ba dawa ïa ka Sorkar India, ka Sorkar Meghalaya, ka Sorkar Assam bad ka Karbi Anglong Autonomous Council (KAAC) ba kin pyn phai noh ïa ka Block-I bad Block-II sha ka Jylla Meghalaya kaba dei ka hok kat kum ki Aiñ bad ka Riti Synshar ka Ri.
Ïa kane ka Resolution la wanrah da u Chief Executive Member (CEM) ka KHADC Bah H.S Shylla ha ka Dorbar Tlang jong ka Council ba sdang hynne ka sngi. Kane ka Resolution kala ïoh ïa ka jingkyrshan ba baroh ki Dkhot ka Ïingdorbar kiba don lut ha ka Liang Synshar.
Haba wanrah ïa ka Resolution, u Bah Shylla ula ong ba ka jingpynbeit ïa ka jingïakajia khappud ka dei ka jingeh bala mad lang da baroh laitylli ki Autonomous District Council (ADC) ka Jylla-kaba donkam bha ïa ka jingiatreilang jong kine ki Council. U ong ba ka khana pateng bad ki lynti jongka Aiñ ki kyrshan ba dei ban pynphai noh ïa ka Block-I bad Block-II sha ka Khasi Hills Autonomous District Council (KHADC) bad ka Jaiñtia Hills Autonomous District Council (JHADC).
Kat kum ka jingong jong u, ka Block-I bad Block-II ki dei ki jaka ba hap hapoh Meghalaya hynrei la pynsnoh jubor ïa ki sha ka Mikir Hills Autonomous District Council (MHADC) ha u snem 1951 mynba ka United Khasi Jaiñtia District Council (KHADC-JHADC) ka dang hap hapoh ka Jylla Assam da kaba shu pynïasnoh lang ha ka Riti Synshar ka Ri ym da ka Instrument of Merger.
“Ïa ka Block-I bad Block-II la pynïasnoh sha ka MHADC da ka Notification No TAD/R/31/50/148 bad ka Notification No TAD/R/31/50/151 ba pynmih ha ka 13 tarik Ïaiong 1951” ong u Bah Shylla haba ong ba kane ka kam ka dei kaba leh be-aiñ bad ka jing pyn donkam bakla ïa ka bor kat kum ka Para 1 jong ka Sixth Schedule jong ka Riti Synshar ka Ri.
U Bah Shylla u ong ba Council ka dawa ïa ka Sorkar India ba kan pyndam noh ïa kine ki Notification ba mih ha ka 13 tarik Ïaiong 1951 khnang ba ka Block-I bad Block-II kan wan phai pat sha Jylla Meghalaya.
Haba kynthoh ba ka jingpynïasnoh ïa ka Block-I bad Block-II kala pynkheiñ bad iuhroit ïa ka hok ba kyrpang jong ki paid riewlum Khasi-Jaiñtia halor ka khyndew ka shyïap, ka jinglong ba kyrpang bad ïa ka kyndon ai jingiada jong ka Riti Synshar ka Ri kumba la pynkupbor, u Bah Shylla ula ong “ Ïa kane la leh halor ka kaiphod jong ka Commission bala thung lyngba ka Notification No TAD/31/50 ba pynmih ha ka 3 tarik Risaw, 1950” bad bynrap “ Ïa ka kyndon jong ka Sixth Scheduled la pyndonkam bakla ban pynduh jubor ïa ka hok longtrai jong ngi ïa ka jaka ba bun bah”.
“Mynta ba ngi la lap ïa kine ki jingleh bakla bad jingleh be-aiñ, ka long kaba donkam ban kyntu ïa ka Sorkar India, ka Sorkar Meghalaya, ka Sorkar Assam bad ka KAAC ba kin pynbeit noh ïa kane ka jingban beiñ jubor ïa ki paid Khasi-Jaiñtia ha ki snem bala leit noh da kaba pynphai bad pynneh biang ïa ka Block-I bad Block-II sha Meghalaya bad sha ki paid Khasi Jaiñtia kat kum u pud u sam bala kdew ha ka Notification ba pynmih ha ka 13 tarik Ïaiong 1951”.
Ki MDC na West Khasi Hills khamtam u MDC ka Rambrai-Jyrngam Bah Kimfa Marbaniang, haba kyrshan ïa ka Resolution ula pynpaw pat ïa ka jingbynniaw ba ka KHADC kam shym la phaikhmat lang sha ki jingkyntur pud jong ka Sorkar Assam ha ki jaka khappud ba hap hapoh ka Constituency jong u ba kynthup ïa ka Langpih.
Une u MDC ula buh ruh ka jingkyntu ba ka KHADC kam dei ban shu leh shongshit ïa kane ka kam namar ka lah ban long pynban ka jingma bad ka jingtim ïa ki paidbah ha khappud lada bakla.
U CEM barim Bah Manstudy Nongrem, ula pynkynmaw ba ka KHADC ha ki snem bala dep kala dep aiti ïa ki kot ki sla ba ïadei bad u pud u sam sha ka Sorkar Jylla ba kan ïasaid bad ka Sorkar Assam haba ïadei bad ka jinglong trai ïa kiba bun ki jaka kiba don hapdeng ka jingïakajia.
Hadien ka jingiatai ïa kane ka mat, na ka liang ka Council kala rai ba shen kan sa leit ïakynduh ïa ka Sorkar Jylla ban ïaphylliew jingmut ba sani halor kane ka kam.