Press "Enter" to skip to content

Pdiang ka NPP ïa ka rai u Dr.Lapang, un long u Nongbtin lynti bad Nongaibuit

Shillong, Naiwieng 20: Ka National Peoples Party (NPP) ba don ha ka Liang Synshar, hynne ka sngi kala pdiang ïa ka rai jong u Dr. D.D.Lapang uba la long u Myntri Rangbah ka Jylla haduh san sien, ba un pynïasoh noh ïalade sha ka Party haba ong ruh ba une u Rangbah un long u ‘Nongbtin Lynti’ bad ‘Nongaibuit’ jong ka Party.
“U Dr Lapang un dei u Nongbtin lynti jong ngi. Un dei u Nongaibuit bad un pyni lynti ïa ngi baroh” ong u Symbud Myntri Rangbah ka Jylla Bah Prestone Tynsong haba ïakren bad ki nongthoh khubor hynne ka sngi ba-ar haba batai ïa ka bynta jong u Dr Lapang kum u ‘Kñi Rangbah’ hapoh ka NPP.
U Bah Prestone ula pynpaw ïa kane hadien shisngi ba u Dr Lapang, uba dang shimti dang shen kum u Chief Adviser ka Sorkar Jylla, ula pynbna ïa ka rai ba shen un sa pynïasoh noh ïalade sha ka NPP kaba ïalam ïa ka Sorkar ki 6 Party-ka Meghalaya Demo cratic Alliance (MDA).
Haba pyntip ba ka Party kam pat ïoh pdiang satia ïa kino kino ki jingpyntip halor kane ka kam, u Bah Prestone ula ong “Nga la ïohi ha ki kot khubor ba ula dep rai ban pynïasoh noh sha ka NPP hynrei haduh mynta ngim pat ïoh pdiang jingthoh eiei”.
Haba kyntait ïa ka jingïakynduh ïa une u Nongïalam bala rangbah bha ha Jylla ban ïakren halor kane ka kam hynnin ka sngi, u Bah Prestone ula ong “Nga la ïakynduh ïa u kum u Chief Adviser jong ka Sorkar Jylla”.
Haba kheiñ ba kane ka rai jong u Dr Lapang kala long kum ka jingai mynsiem ba radbah ïa ka NPP, u Bah Prestone ula ong “ Kat ka kyrdan u Dr Lapang uba dei u Nongïalam bala rangbah tam ha Jylla, uba dang trei ïa ka kam sain hima sima, kan long shisha ka jingai mynsiem ïa ka Party lada dei shisha ba u rai kumtei (ban rung sha ka Party)”.
Haba pynbna ïa ka rai hynnin ka sngi nyngkong, u Dr Lapang ula ong ba naduh ba u sdang ïa ka jingim jong u bad ki National Party la bun bun snem, u sngew ba kan iahap shibun ban iatreilang bad ki Party kum ka NPP kaba don ka dur ka dar ha ka Ri baroh kawei.
“Ngan pynïasoh sha ka NPP namar ka dei ka National Party bad u President jong ka Party ruh u dei na Meghalaya bad ka myn siem sngewjan ka don hangne. Nga ngeit da ka jingdon ïa ka rynsan kaba biang, kan bha shibun ban ïa kaba long u briew shimet. Lada nga don marwei wat kito kiba don ha syndah jong nga ruh kin nym lah ban iadonlang bad u briew ba marwei namar ki dei kiba ïasoh bad ki Party bapher bapher ym tang ka Congress” ong u Dr Lapang.
Haba pynpaw ba un nym ïakhun shuh ïa ki elekshon ha Jylla, une u Nongïalam bala rangbah ka Jylla ula kut jingmut ban shim ïa ka bynta kaba kongsan bha ha kaban pynthikna ïa ka jingskhem jong ka MDA ba ïalam da ka NPP.
Lah ban kdew hangne ba u Dr Lapang ula iehnoh na ka Congress haba sdang jong une usnem kum ka dak ban pynpaw ïa ka jingpyrshah ïa ka Polici ka All India Congress Committee (AICC) kaba la phah beh noh ïa baroh ki briew bala tynmen bad noh ka rta.