Press "Enter" to skip to content

Rakhe ka Jylla ïa ka rukom sumar ba pynkylla ïa ka rukom bam bad im

Shillong, Naiwieng, 20: Da ka jingthmu ban kyntiew ïa ka rukom sumar ba khlem dih dawai ban ïada na ka jingpang da kaba pynkylla ïa ka rukom bam bad ka rukom im (Naturopathy) ka Jylla Meghalaya ka la rakhe ïa kane ka sngi ha ka jingïalang kaba la long ha Civil Hospital. Shillong.
Ïa kane ka jingrakhe ba la pynlong da ka Yoga and Naturopathy Department jong ka Civil Hospital la ïadonlang u Pravin Bakshi, Secretary ka tnat Health and Family Welfare bad uba long ruh u Director jong ka tnat AYUSH uba la long u kongsan ha kane ka sngi.
U Bakshi haba kren ha kane ka sngi, u la ong ba ka ‘Naturopathy’ ka la suhthied ha kylleng ka pyrthei kum kawei na ki lad jingsumar ka bym don jingma ka bym donkam ban tar ïa ka doh bad ka bym don jingktah ïa ka koit ka khiah. U la ong, naduh ki por hyndai, ki briew ki ju pyndonkam da ki dawai kynbat ban pynkoit ïa ki jingpang. “Ngi donkam ban phikir bha ïalade ha ka rukom im, da ka jingsumar lyngba ka Naturopathy” u la bynrap.
Shuh shuh u la ong ba ka Sorkar ka la buh thong ban pynsaphriang ïa ka jingai jingsumar lyngba ka AYUSH. “Ka Jylla ka donbok haduh katta katta ban don ïa ka ophis treikam bapura jong ka Directorate of AYUSH bad kaba la biang nadong shadong ki nongtrei kiba la tbit bad ki tiar jingsumar kiba paka,” ong u Bakshi.
U la ong shuh shuh ba ka Meghalaya ka dei jylla kaba riewspah haduh katta katta ha ka jingmih kynrei ki dawai kynbat bad pynpaw ruh ba ka Jylla Meghalaya ka dei ban shim kabu ba ka Naturopathy kan ïaid ryngkat bad ka karkhana jngohkai pyrthei kumba long ha ka Jylla Kerela.
Ha kane ka sngi ka Dr. (Mrs.) L Papiah kaba long ka Yoga and Naturopathy Physician, Civil Hospital Shillong kaba la batai bniah bha halor ka jingsdang bad ki jingmyntoi na ka jingsumar lyngba ka Naturopathy.
Ka la ïathuh ruh ïa ka rukom im jong u Mahatma Gandhi, ïa uba la tip kum u Kpa ka Naturopathy, ban pynshlur sha ki paidbah jong ka ri baroh kawei ban sumar ïa ki jingpang lyngba ka Naturopathy.