Press "Enter" to skip to content

Rakhe ka Mawlyngnong ïa ka ‘World Toilet Day’ ba nyngkong eh ha Meghalaya

Shillong, Naiwieng, 20: Ka jylla Meghalaya hynnin ka lah sngi u Blei ka la rakhe ïa ka “World Toilet Day” ha ka sien banyngkong eh ha ka Jylla kum shi bynta ban pynsngewthuh ïa ki nongshong shnong ka jylla ban thaw noh da ki jaka leit bar kiba paka kiba katkum kane ka juk mynta, kata, da ki paiñkhana bad ban kiar na ka jingleit sharud sha kiar, kaba long ka dawbah ba pynsaphriang ki jingpang kiba laiphew jait.
Ïa ka jingrakhe la sdang mynta u snem na ka shnong Mawlyngnong kaba la ïoh ïa ka nam kum ka shnong kaba khuid tam ha ka dewbah Asia bad kaba la ïoh ruh ïa ka nam kum ka shnong kaba la don ïa ki paiñkhana ha manla ki thliewiing.
La sdang ïa kane ka jingrakhe da ka jingïaid paidbah na Mawryngkew Sharatia bad la pynkut pat ha ka shnong Mawlynnong, ha kaba la ïashim bynta da ki saw tylli ki shnong bad ki khynnah jong ki ar tylli ki skul kiba la rah ïa ki placard kiba don ïa ki jingthoh phawer kiba har rukom, kiba ïalap sha ki para nongshong shnong ban kiar na kaba leit shabar sha ki rud ki kiar bad ki khlaw ki btap bad ban shna noh da ki paiñkhana kiba paka.
Kine ki jingthoh ha ki placard ki long ruh kum shibynta na ka jingïakob thoh ktien ne ki Slogan. Ïa kane ka jingïaid paidbah
Ha ka jingïalang paidbah ba la pynlong da ka ophis jong ka Pynursla C&RD Block ha ryngkat ka jingïatreilang bad ka Swachch Bharat Mission (Grameen) la ai jingpynsngewthuh sha ki paidbah da u Bah D Hynniewta, Sub-divisional Officer (SDO) ka Pynursla Civil Sub Division, u Bah P. Khonglah, Block Development Officer jong ka Pynursla C&RD Block, u Consultant ka Swachch Bharat Mission (Grameen) u Bah MW Kharkongor bad u Rangbah Shnong barim ka shnong Mawlynnong u Bah Thomlin Khongthohrem bad u Rangbah Shnong ka Shnong Nohwet u Bah Bostwel Khongthohrem bad kiwei kiwei.
Kine ki nongkren ki la batai kham pynshai shuh shuh sha ki paidbah ba ki dei ban kiar na ka jingleit shabar pathar sha ki rud ki kiar bad ki khlaw ki btap bad shna noh da ki paiñkhana ha manla ki thliew iing, khnang ban lait na ka jingsaphriang ki jingpang kiba bun jaid.
Ha kane ka sngi, la sam ruh ïa ki khusnam sha ki nongjop ha ka jingïakob thoh Slogan, ba kynthup ïa ka Nongeitniang RMSA Secondary School kaba la ïoh ïa ka nam lahduh, ka Shnong Lympung Shyrna kaba wan baar bad ka Nohwet Border Area Secondary School kaba la wan ha ka kyrdan kaba lai.
Ki paidbah ha kane ka sngi ki la ïashim bynta ruh ha ka jingsmai ban kiar noh na kaba leit bar pathar sha ki rud ki kiar jong ka shnong bad ki khlaw ki btap, ha kaba la lam khmat ïa ka jingshim smai da ki heh Ophisar bad kumjuh ki nongïalam shnong jong ki shnong.
Kine ki Heh Ophisar ki la leit jngoh katto katne tylli ki thliew ing ban ïasyllok bad ki trai iing bad ban kyntu ba ki dei ban shna noh mardor da ki paiñkhana bapaka bad ha kane ka jingleit rung iing, la lap ba ha kiba bun hi ki iing, ki briew ki la long kaba la sngewthuh bad ki la don ruh la ki paiñkhana ba paka, watla ka iing sah jong ki kam pat long kaba paka.