Press "Enter" to skip to content

Shitaiew sah ki NSS Ri-Bhoi College ha Umkyrpiang ban tip ia ka jngeh ki paidbah

Nongpoh, Naiwieng, 20: Kum ka thong ban ai ka jingmyntoi sha ki paidbah lyngba ki prokram bapher bapher bad kumjuh ban wad jingtip halor ka jingdonkam bad ka eh ka shon kaba ki paidbah ki ïakynduh, ki samla pule ka Ri-Bhoi College kiba dei ruh ki dkhot ka National Service Scheme (NSS) ka Ri-Bhoi College Unit kila leit ban sah syndon haduh shitaiew lynter haka shnong Umkyrpiang ha Ri-Bhoi District naduh ka 11 tarik haduh ka 17 tarik mynta u bnai.
Hapoh ka jingïalam jong u NSS Programme officer u Dr. A Dey ryngkat bad 46 ngut ki dkhot ka NSS Ri-Bhoi College Unit kila hiar sha ka shong Umkyrpiang kaba dei ruh ka Speicial Camp hapoh ka National Service Scheme naka bynta ban pynlong ïaki prokram kiba pher bapher kiba ai jingmyntoi ïa paidbah, kum ki prokram ai jinghikai, ki jingpynkhuid shnong, ka jingshna ïaki jaka bret ñiut bad kiwei kiwei nalor ka jingsam ïaki jaiñ kup syiad sha ki khynnah ha katei ka shnong.
Halor katei ka jingleit jngoh ki NSS Volunteer jong ka Ri-Bhoi College Unit kala long ruh ka jingmyntoi kaba khraw ïaki paidbah nongshong shnong ha kaba kum ki samla pule hapoh ka jingïalam u Dr. A Dey bad ki nonghikai kila shim bynta shitrhem ban pynlong ruh ïaki prokram hikai halor ka pule ka puthi bad ka jingdonkam ïaki khynnah, halor ka koit ka khiah ka khuid ka suba bad kumno ban tyngkai ïaka um.
Kumba long mynta ki khynnah ki donkam bha ïaka pule ka puthi kaba dei ruh ka juk kaba baroh baroh ki ïabeh ban ioh ïaka jingnang ka jingstad, ban leh khuid bad leh suba naka bynat ka koit ka khiah bad kumjuh ban pynneh pynsah ïaka mariang bad ki um ki wah ban lait naka jingtyrkhong um bad ka jingshit ka mariang ha kaba lyngba katei ka prokram ai jinghikai ka long ruh ka jingkyrkhu bad ka jingmyntoi kaba khraw ïaki paidbah ba kin tip kumno ban pynnang pynstad ïaki khun, ban wanrah ïaka khuid ka suba bad hakajuh ka por ban sumar ïaki sawdong sawkun ka mei mariang bad ki jingdon jingem haka.
Shuh shuh naka liang kitei ki dkhot ka NSS kila pynlong ruh ka jingwad bniah hapoh katei ka taiew ban pyndep ïa shibun ki kamram ba ki dei ban pyndep bad pynlong ruh ïaka jingwad bniah halor ka jingdonkam ki paidbah ha katei ka shnong bad ka eh ka shon kaba ki mad kum ki nongshong shnong khamtam haki shnong nongkyndong ba bun naki paidbah ki shem jingeh khamtam ha kaba ïadei bad ki skhim sorkar.