Press "Enter" to skip to content

Weng noh ïa ka Citizenship Bill, lym kumta ka jingïakhih kan jur: NESO

Guwahati: Ka synjuk ki Seng Samla pule ka thaiñ shatei lamihngi, ka North East Students Organisation (NESO) la pynlong ka jingïakhih kaba jur da kaba pynlong ka jingïalang pyrshah ha nongbah Guwahati ha ka sngi ba ar ban dawa na ka sorkar u Modi ban weng noh ïa ka Citizenship (Amendment) Bill 2016.
Kane ka Amendment Bill ka thmu ban pynlong nong India ïa ki Hindu, ki Sikh, ki Khristan kiba wan phet na ka jingshah lehbeiñ ha Pakistan, Bangladesh bad Afghanistan.
Ka NESO ha kane ka jingïakhih pyrshah, ka la maham ruh ïa ka sorkar pdeng ba lada kam weng noh shisyndon ïa kane ka Bill, ka jingïakhih kan nang jur. “Ngin nang pynjur ïa ka jingïakhih, lada ka sorkar kam weng noh ïa ka jingthmu ban wanrah ïa kane ka Bill ha kane ka dorbar tlang”, la ong u Samujak Bhattacharya, Adviser ka NESO.
Ha kajuh ka por u Samujal, u la ong ruh ba ki Seng Samla pule ha baroh kawei ka thaiñ shatei lammihngi kin pynlong ki jingïalang pyrshah ha ka 30 tarik mynta u bnai ha man la ki jylla ban bteng ïa kane ka jingïakhih.
Ha kajuh ka por ka NESO, ka la dawa ruh ba ka sorkar kadei ban weng lut ïa baroh ki jingpynbna paidbah(notification) kiba ktah ïa ka jinglong trai ri ki briew hangne, kum ka Foreigners’ (Amendment) Order, 2015, Passport (Entry into India) Rules, 2015 bad kiwei kiwei.
“Ngin leit ïakhih ruh sha nongbah Delhi, katba ka sorkar kam pat pynurlong ïa kine ki jingdawa jong ngi”, la ong u Samujal, uba la bynrap ruh ba ka Seng ka dawa ba baroh ki sorkar ka thain shatei lammihngi, nangta ki MP, ki MLA kidei ban ïeng pyrshah ïa kane ka Bill.