Press "Enter" to skip to content

Mynta khot hajir ka CWE ïa u DC bad SP ba shah shoh i Kong Agnes

Shillong, Naiwieng 25: Ka Committee on Women Empowerment (CWE) jong ka Ïingdorbar thaw Aiñ ka Jylla kan khot hajir mynta ka sngi ïa u Deputy Commissioner (DC) bad Superintendent of Police (SP) ka East Jaintia Hills halor ka jingjia shah shoh bad thmu pynïap ka Nongïalam ka CSWO Kong Agnes Kharshïing bad ka Amita Sangma.
Kane ka Committee bala khlieh da ka MLA ka Congress ba don ha Liang Pyrshah na East Shillong Constituency, Kong Ampareen Lyngdoh, kala shimkhia ban tuklar ïa kane ka jingjia haka jingïalang ba long myn ha ka 15 tarik Naiwieng.
Ki khubor ki ïathuh ba ka Committee kan pan jingtip ïa ka jingïaid jong ka case na u DC bad SP bad ïa ki daw kiba lam sha ka jingthombor ïa kine ki arngut ki Nongïalam Sengbhalang.
U Deputy Commissioner Bah F.M.Dopth dang shen ula thung ïa ka jingtohkit bala khlieh da u Addl Deputy Commissioner bad SS.Syiemlieh ban pynthikna ïa ki jingshisha bad ki daw ba lam sha ka jingshoh dusmon ïa kine ki arngut ki Longkmie.
U Bah Syiemlieh uba dang sdang ïa ka jingtohkit hynnin ka sngi saitjaiñ, da kaba leit ïakynduh ïa kine ki Longkmie ha North Eastern Indira Gandhi Regional Institute of Health and Medical Science (NEIGRIHMS), ula ïoh por 15 sngi ban aiti ïa ka kaiphod jingtohkit.
U ADC ula shah khang hynnin ka sngi ban buh jingthoh ïa ki jingbatai ïa ka jingjia (Statement) na i Kong Agnes Kharshïing namar ba im pat don haka bor met kaba biang. Hynrei ula buh jingthoh tangia ka jingbatai ka Amita Sangma lem bad ki Doktor jong kane ka Hospital.
I Kong Agnes bad ka Amita Sangma kila mynsaw jur ha ka jingshah thombor ha palat 40 ngut ki briew kiba la suba jur ba dei ki mafia dewiong hapoh ka shnong Tuber-Sohshrieh myn ha ka 8 tarik Naiwieng. Kane ka jingjia kala jia hadien ba kine ki longkmie kila shondur ïa ki trok kit dewiong.
Ha kajuh ka por, ka Committee kan sa ïakynduh ruh mynta ka sngi ïa ka Meghalaya State Commission for Women ban ïakren ïa kane ka kam.