Press "Enter" to skip to content

Ïaid sahuh ki trok kit dewïong na Rwiang-Langja shaduh Assam

Nongstoiñ, Naiwieng, 27: Wat la ka ïingbishar ba hakhlieh duh jong ka ri, ka Supreme Court ba don burom kam shym pat la shah ban kit bad shalan ïa u dewïong na ka jylla sha kiwei pat ki jaka. Hynrei ha West Khasi Hills ka jingshalan sop sop ka jur bha ha kine ki sngi.
Ka jingïohlad jong ki trok ban shalan dewïong ha West Khasi Hills ka long da kaba ïaid lyngba ka surok Rwiang sha Langja lyngba ka shnong Kriangrin, Siangra, Nonglang ter ter. Napdeng kitei ki trok, ki don kiba ïaid na ka surok Langja sha Tynghor shaduh Rangsahpara ban poi sha Kampholduli bad Boko. Ki don pat ki trok kiba ïaid na Ktiehthawïar sha Langpih bad Kampholduli lyngba ka surok ba la shna da ka sorkar Assam.
Dang ha ka miet sngi saitjaiñ kawei ka trok kit dewïong haba la poi ha Umkhynraw shuwa ban poi ha ka shnong Umwahlang ka la kylla baji. Ki tyllong khubor ba la ïoh lum ki ïathuh ba mar shu kylla katei ka trok, u nongñiah bad u nongbud ki la weng noh ïa ki number plate bad nadien bad nakhmat bad ki la pyntip wut wut sha u trai kali. Ha kajuh ka miet u trai u la pahh da ka kali khwai bad tan noh ïa katei ka trok ba kylla.
Ka jingïohlad ki trok kit dewïong ban ïaid na katei ka surok ka la pynsuba jur ba ka lah ban dei ka jingïasngewthuh jingmut bad ki bor sorkar. Namar na ka liang ki paidbah, ki sordar jong ki shnong ryngkat ka jingïatreilang bad ki nongïalam ka FKJGP Rimuliang Circle, ha ka taïew ba la dep ha ka jingïalang kaba la long ha Nonglang ki la rai da kawei ka jingmut ban khang pyrshah ïa ki trok kit dewïong ban ïaid na katei ka surok, namar katei ka surok kam pat dei ka surok ba ki trok kit dewïong kin ïaid.
Nalor kata la suba jur ruh ba ka jingïoh lad jong ki trok kit dewïong ban ïaid na katei ka surok, ka lah ban long namar ki don ki riew shim kabu kiba pynshlur ïa ki tang na ka bynta ka jingmyntoi jong ki shimet.
Ka long ruh kaei kaei kaba sngewsih ba lada ka surok na Rwiang Langja haduh Langpih ka jot kan pra, ki paidbah nongleit nongwan jong katei ka thaiñ kin shem jingeh haduh katta katta. Khamtam eh kiba pang ba shitom kiba donkam ban leit phah sumar sha Nonglang PHC, Nongstoiñ CHC bad sha kiwei pat ki jaka kin mad ïa ka jingeh kaba khraw khamtam ha ka por lyiur.