Press "Enter" to skip to content

Kular u CM ban pyllait 50% ka bainong jong ki ASHA shwa ka Khristmas

Shim bynta lang kiba armet bad ki khyllung
Shillong, Naiwieng, 27: U Myntri Rangbah ka Jylla, u Conrad K. Sangma, u la kular sha ki nongïalam jong ka Meghalaya ASHA Workers Union (MAWU) ba ka Sorkar kan sa pyllait shwa 50% ka bainong jong ki Accredited Social Health Activist (ASHA) shwa ka Khristmas bad u la kular ruh ban siew pyndep lut ïa ka bainong jong ki ASHA ha shwa u bnai Lber, 2019 ne shwa ka Financial Year.
U Myntri Rangbah ka Jylla, u la ai kane ka jingkular hadien ba ki ASHA kiba don hapoh ka shatri jong ka Meghalaya ASHA Workers Union (MAWU) mynta ka sngi ki la pynlong da ka jingïashong shah thngan kaba khlem pud sngi ha jaka pynieng kali, kaba don markhap bad ka ophis Addl. Secretariat, Shillong.
Ka jingshim rai jong ka Seng ban pynlong da ka jingïakhih long hadien ba u Myntri ka tnat ka Koit ka Khiah u Bah Alexander L. Hek, um shym la lah ban ai kano kano ka jubab kaba shai ha ka jingïakynduh ïa ki nongïalam ka seng ha ka 10 tarik, Jymmang mynta u snem bad hynnin ka lah sngi u Blei.
Ka President jong ka MAWU, ka Kong S. Marboh ha ka jingïakren bad u Mawphor hadien ka jingïakynduh ïa u Myntri Rangbah ka Jylla ha ka por janmiet, ka la ong, “u Myntri Rangbah u la ai ka jingkular ba ka Sorkar kan sa pyllait shwa 50% ka bainong jong ki ASHA shwa ka Khristmas bad u la kular ruh ban siew pyndep lut ïa ka bainong jong ki ASHA ha shwa ka Financial Year.”
“U (Myntri Rangbah) la pyntip ruh ïa ngi ba ka Sorkar kan siew shwa ïa ka pisa kaba rim bad hadien kata un sa khot ïakren ïa ngi halor ka jingtyrwa jong ka Jylla ha kaba ïadei bad ka jingsiew ïa ka Honorarium,” ka la ong.
Ki lai tylli ki mat jingdawa jong ka MAWU na ka Sorkar ki kynthup ïa ka jingbym ïoh ïa ka Honorarium ba dei ban bhah da ka Sorkar Jylla, ka jingbym pyntreikam ka Sorkar Jylla ïa ka ASHA Benefit Scheme naduh u snem 2014 bad ïa ka Meghalaya Maternity Benefit Scheme kaba ki nongtrei ASHA ki dei ban ïoh naduh u snem 2012.
Shwa kane, ka General Secretary jong ka MAWU ka Kong Mira June Myrsing ka la ïathuh ba ka jingmih sha surok ban pynlong da ka jingïakhih ka dei hadien ba ka Sorkar ka la ïai sngap mynthi ïa ka jingdawa jong ka seng ban siew ïa ka Honorarium na ka bhah jong ka Sorkar Jylla kaba haduh mynta hi ki ASHA ki ïoh ïa kane ka jingsiew tang na ka Sorkar Pdeng.
“Lada ngi pep noh wat tang shi sngi ruh ngi duh noh ïa kaba ngi dei ban ïoh nalor ba ka kam ka dei kaba khiah haduh katta katta,” ka la ong.
“Ngi shakri ym tang ïa ki longkmie ba armet, hynrei wat ïa ki briew kiba ngat ha ka jingpang khieshohrih, kiba pang Tuberculosis (TB) hynrei ka Sorkar pat ka siew ïa ka bai kali haba ngi leit rah ïa ki kaiphod sha ki PHC bad CHC,” ka la ong.
Halor ka Meghalaya Maternity Benefit Scheme (MMBS), ka la ïathuh ba ha ka por ba dang long Myntri Rangbah u Dr. Mukul Sangma, u la kular ba ki longkmie armet kiba kha ïa ki khun banyngkong bad baar ha iing kin ïoh T.2000 katba ki ASHA pat kin ïoh T.500.
“Lada jia ba kha ha ki jaka sumar ki longkmie ba armet kin ïoh T.4000 bad T.1000 na bynta ki ASHA,” ka la ong bad bynrap, “hynrei wat haduh mynta mynne, ki ASHA ne wat ki longkmie ba armet kim pat ju ïoh satia ïa katei ka pisa, (don ki longkmie kiba ïoh shiteng).” Ha kane ka sngi, ki ASHA kiba wan ïashim bynta ki kynthup ruh wat ïa kiba la armet bad ki longkmie kiba wan kit lang ïa ki khun kiba dang rit.
Haba pynpaw ka jingsngewia ïa halor kane, ka Kong Mira June ka la ong, “ngi sngewkhia haduh katta katta ban ïohi wat ki para longkmie kiba trei kum ki ASHA wat hapdeng ka jingarmet kim banse ban wan ïashim bynta lang ha ka jingshah thngan khlem pud sngi bad don ruh kiba wan kit ïa ki khun kiba dang rit.”