Press "Enter" to skip to content

Kut ka Dorbar Tlang JHADC khlem soh

Jowai, Naiwieng 27 : Ka Ka Dorbar Tlang jong ka Jaiñtia Hills Autonomous District Council (JHADC) kala wai noh khlem kino kino ki soh ki sla. Kane ka Dorbar kala sdang naduh ka por 10:30 bad kala wai noh tang kumba shi kynta shiphew minit bad khambun ka por kala lut dei tang ka jingkynmaw burom ïaki dkhot bala khlad noh bad ka kynta kylli jingkylli bad jubab.
Hadien ka kynta kylli jingkylli la kynmaw burom ïaki ar ngut ki dkhot ba la khlad ba kynthup ïa u (L) Sawang Lamurong bad ka MDC ba shu sieh (L) Dr. K Rymbai.
Ha ka kynta kylli jingkylli U MDC ka liang pyrshah uba long u nongïalam ka UDP West Jaiñtia District U Ma Moonlight Pariat ula ther tyngeh ïaki dkhot ka liang synshar kiba wan dorbar khlem ka jingpynkhreh bad kim lah ban ai ka jubab kaba shai hapoh ka ïing dorbar.
U ma Pariat ula mut ban wanrah ïaka motion halor ka rukom treikam ka Executive Committee kaba ïalam U Ma Madonbai Rymbai, CEM JHADC, hynrei ula weng noh ban rah ïaka motion hadien ba um shym ïoh ki jubab kiba shai haka kynta kylli jingkylli.
Ha ka kynta kylli jingkylli bad jubab, U Executive Member jong ka tnat Transport U Ma Shembok Suchiang um lah satia ban jubab ïa u Ma Pariat halor ka jingthied ïa kawei ka kali da ka JHADC dang shen. Namar kane u CEM JHADC ula hap ban ieng ban ai jingpynshai.
Kane ka kali ka dei jong u CEM JHADC bad ka dei ka Mahindra Scorpio kaba shongdor T.17 lak 80 hajar.
U Ma Shembok Suchiang u la shim por ban jubab bad u la jubab 16 tarik u bnai Nailar (August) ka aksiden. U CEM ula hap ban pynshai dalade ba ka jingjulor jong ka jingaksiden ka long 4 lakh bad ka kompani ka la pan T. 50000 tyngka khnang ban kylliang noh da kaba thymmai. U la iathuh ruh ka Council ka la thied ïa ka Mahindra Scorpio kaba shondur T. 17.80 lakh.
U Ma Andrew A Shullai uba long u Executive Member ba dei khmih ïa ka pla tyngka ruh um shym la lah ban ai ka jubab kaba shai halor ka jingpynlut pynsep ïaka khajna ba ïoh lum ka konsil na u Minor Mineral kaba la kot T. 10,36,78,120.00.
Haba kylli u Ma Pariat ha kano ka dur la pyndonkam ïa kane ka pisa, ka jubab U Ma Andrew ka long bala bhah lut sha baroh ki tnad. U ma Pariat ula kylli biang da kaba batai shai katno la bhah ne mang kawei ka tnat treikam ka konsil. Hangne u ma Shullai u la jubab ba la siew tulop ïa ki nongtrei kaba la kot haduh T.7.5 klur haduh u bnai Nailur (September) 2018.
U Ma Pariat u la kylli shaei kaba tam bad hangne u Ma Andrew ym shym la lah jubab shuh. Nalor ka khajna Minor Mineral na u Major Mineral (dewiong) ka khajna ba ïohlum ka konsil naduh u Jylliew haduh u Naiweing 2018 kala kot T. 14,00,99,017.
Kiwei kiwei pat ki jingkylli ki long halor ki khyrdop ka JHADC ha Mookyndur, West Jaiñtia Hills bad Umkiang East Jaiñtia Hills kaba la kylli da u Ma H S Bareh U MDC ka Sutnga Narwan. U CEM la jubab ba la pynïaid ia kane ka khyrdop da Edystone Shylla kum u nongshim wai na bynta lai snem. U MDC ka Nartiang U Ma Thombor Shiwat katno ka JHADC ka ai wai? U CEM Ma MB Rymbai ula jubab T. 32. lakh shisnem.
Ha kaba ïadei bad ka jingthung Co-Chairman kaba la buh jingkylli u Ma Pariat, U Ma Rymbai ula jubab ka don ka jingmang tyngka na ka bynta ka post Vice Chairman jong ka tnat Planning, hynrei ym shym la thung ïano ïano kum Vice Chairman te kumta ki la thung Co-Chairman bad ka tulop kalong T.10 hajar shibnai.
. Kitbok ki MDC: U Chairman ka JHADC hashuwa ban pynwai ïaka dorbar ba khatduh jong kane ka samoi ula kitbok kitrwiang ia baroh ki MDC ba mynta ba kin jop biang sa shisien, kumjuh ïalade ba kin ïoh biang ban trei na ka bynta ban wanrah ïaka roi ka par hapoh u pud u ang ka konsil.