Press "Enter" to skip to content

Kyntu u President ka Auto Association ïa ki Dribar ban husiar haba kit ïa ki paidbah

Nongpoh, Naiwieng, 27: Ban ai jingshngain ïa ki paidbah nongleit nongwan lyngba ki Auto Rickshaw kiba ju shakri ïa ki paidbah ha ka leit ka wan ha ka thain Nongpoh, u President ka Nongpoh Region Auto Owner and Driver Association u la buh ka jingkyntu kaba jur ïa baroh ki dribar haba ki kit ïa ki nongleit nongwan ki dei ban husiar bad don ka jingkitkhlieh haba ki har ne kiew na kino kino ki jaka.
Kane ka jingkyntu u President katei ka seng, u Bah Marcus Marten ka dei ruh hadien ba bun ki jingjia ba sngewsih ki jia tang na ka daw ka jingbym husiar haba kiew Kali ne hiar na ki Kali kaba long pynban ka jingsngewsih ym tang ïa ka seng kaba ai jingshakri hynrei ïa kito ki longïing kiba mat ïa ki jingsngewsih.
Haba kren bad u Nongthoh khubor, u Bah Marcus Marten u la ong ba ka Association nangne shakhmat kan dang peitngor ïa ka leit ka wan ki Dribar Auto bad ka buh ruh ka jingkyrpad ba ki dei ban da adkar haba kit ïa ki nongleit nongwan.
“Bunsien hi ka jingjia ba sngewsih ka jia ym tang ka jingbym adkar ki dribar kiba kit ïa ki nongleit nongwan, hynrei ki don ruh ki paidbah haba ki kiew ne hiar na ki Kali paidbah kim ju da peitngor bad na ka daw ka jinghiar thurmur ka wan jia pynban ka jingjia kaba sngewsih” u la ong.
Namarkata, ban shngain ki nongleit nongwan, ki khynnah skul bad ki paidbah ha ka leit ka wan lyngba ki Auto Rickshaw kiba ju shakri ïa ki paidbah nongleit nognwan, na ka liang ka seng ka la kyntu naduh ki Dribar bad ruh ki paidbah nongleit nongwan ba ki dei ban da husiar haba ki shong kali ne na ki jaka ba ki kiew ne hiar haba ki leit sha ki jingdonkam khnang ba kane kan nym wan rah ki jingmynsaw ne ki jingjia ba sngewsih kaba la ju jia na ka por sha ka por, la bynrap u une u President ki Auto Association na ka thaiñ Nongpoh.