Press "Enter" to skip to content

Pynlut phut ka sorkar, wat hapdeng ka jingkyrduh pisa: Liang Pyrshah

Palat 1 klur lut tang ha ki Chairman, Co- Chairman
Shillong: U MLA jong ka Liang Pyrshah, u Bah Himalaya Shangpliang, u la ther tyngeh ïa ka sorkar jylla, halor ka jingpynlut phut jong ka, wat hapdeng ka jingkyrduh pisa kaba jur.
Haba wanrah ïa ka Call Attention Notice, u MLA Mawsynram, u la ong ba ka sorkar jylla ka kyrduh pisa namar ka jingkhang tih dewïong ka NGT bad ka jingpyntreikam ïa ka tulop thymmai ki shakri sorkar, hynrei ki Myntri sorkar ki bunkam ha kaba ñiad rong bad pynthymmai ïa ki ïing shong jong ki. U la kynnoh ruh ba wat lada ka sorkar lyngba ka tnad pla tyngka, ka la pynmih ïa ka hukum ban leh kunai kum ha kaba thied kali, ban thaw kam thymmai, ban pynthymmai ïa ki jaka sah sorkar, hynrei kaei kaba la ïohi ka long pynban markhongpong, namar la ïohi ba ka sorkar ka la ïai bteng ban thied kali remdor, ki myntri ki pynthymmai ïing. “Kaei kaba ilyngngoh ruh ka long ba la jan man ka sngi la shu thung kam Chairman, Co- Chairman ïano re ïano, khlem pyrkhat shuh ïa ka jinglut, katba u paidbah pat u nang mad jingeh”, la ong u Bah Shangpliang, da kaba pyntip ruh ba haduh mynta la don haduh kumba 65 ngut ki Chairman, Co- Chairman, Vice Chairman bad kiwei kiwei. “Lada kheiñ na ka jingsiew sha ki Chairman bad kiwei kiweim ka jinglut ka poi kumba 16 ne 17 lak shi snem, lada 65 ngut kan poi katno”, u la ong.
Nalor kine ki don sa san ne hynriew ngut ki Adviser, nangta sa u Chief Adviser. “Nga lyngngoh kumno ka sorkar ka donkam haduh katne katne ngut ki nongaibuit”, u la ong.
U la ong ruh ba ka sorkar kadei ban peit ha ïa ka jingpynlong ïa ki tamasa, kumba u Myntri Rangbah hi u la pynpaw. Na ki tamasa kum ka Tamasa synrai, ka tamasa syntiew dieng cherry, ka tamasa ïatem ïaput NH-7, haduh katno ki la wanrah ka jingmyntoi ïa ka jylla. Katno ngut ki nongshang pyrthei ba nabar ki wan. Katno ka sorkar ka ïoh khajna na ki dukan kyiad ba la die pathar ha kine ki tamasa.
U MLA Liangpyrshah u la ther ruh ïa ka jingleit ba khah khah u Myntri Rangbah bad ki Myntri sha nongbah Delhi bad kumjuh ruh ka jingleit bar ri u Myntri Rangbah bad katno katne ki Myntri. “Kaei ba phi la wanrah na ka jingleit ba khah khah jong phi sha Delhi?”, u la ong, da kaba bynrap ba ym shym la ïohi eiei ba sorkar na Delhi kan theh pisa sha Meghalaya kat ka jingleit u Myntrai Rangbah bad ki Myntri. Nangta u la ong kaei pat ka jingmyntoi ba ka jylla ka ïoh na ka jingleit bar ri u Myntri Rangbah bad katto katne ki Myntri.
Kawei pat ka jingpynshisha ba u Bah Shangpliang u la kdew halor ka jingkyrduh pisa ka sorkar MDA, ka long ba bun ki Bank ki la pynpaw ba mynta ym ju don jingthep pisa shuh na ka sorkar Meghalaya, lait noh tang ka jingsei. U la ong ruh ba bun ki Corporation, ki Board ki don hapdeng ka jingsyier ba ki hap khang khyrdep noh, namar ba ka sorkar kam shym la ai jingïarap eiei ïa ki. “Ka sorkar Meghalaya ka long kum kato ka Jhad ba la jan ngam bad mano ban pyllait im ïa kane ka Jhad, lada u Kapten jong ka, um peit ïa kane ka pla ba pei”, u la ong.
Haba jubab ïa kane, u Myntri Rangbah, u Conrad Sangma, u la ong ba ka jingthied kali kadei namar ka jingdonkam jong ki ophisar, ki Doktor ban trei bad ban shakri ïa u paidbah. “Hato ki ophisar ne ki Doktor kin leit sha ki jaka nongkyndong da ki kali la jong”, u la ong, da kaba bynrap ba kat ka kyrdan u DMHO ruh um don kali na ka sorkar.
Halor ka jingleit Delhi, u Conrad u la ong ba ka sorkar jylla kam lah ban shu shong hangne bad ap ba ka sorkar na Delhi kan wanrah hi ïa ka pisa. “Ngin hap ban leit ïakynduh ban pynpaw ïa ki jingeh jong ngi, lym kumta kumno ka sorkar pdeng kan tip ïa ki jingdonkam jong ngi”, u la ong.
Ha kaba ïadei bad ka jingleit sha bar ri, u Conrad u la ong ba ka long kaba donkam ban leit namar ba ki don shibun kiei kiei kiba myntoi, kum ka jingleit sha France ha kaba la ïohlad ban leit peit ïa kawei ka Textile University, kaba long ka jingtreikam kaba ïadei bha bad ka jylla Meghalaya. Nangta ki Information Centre kiba long ka jinghikai na ka bynta ki samla hangne. Nangta ka don ruh ka Exchange Programme ha kaba mar lai hajar ngut ki samla pule na India ki ju ïoh leit sha France, hynrei na Meghalaya ym ju don namar ba ngim tip. Lyngba kane ka jingleit sha katei ka ri, ka sorkar kan ïohlad ban phah ïa ki samla pule nangne ruh.
Halor ka jingthungkam Chairman, u Conrad u la ong ba ka sorkar ba mynshuwa ka khambun ki Chairman ban ïa kane ka sorkar ba mynta. U la ong ruh ba ka jingthungkam Chairman na ki nongïalam na ki Seng sainpyrthei ka long ba ka sorkar ka ïohi ba kidei ki briew kiba don bad u paidbah bad ki khamjan sha ki bad ki sngewthuh ïa ki jingeh u paidbah.
Ha kaba ïadei bad ki tamasa, u Myntri Rangbah u la ong ba ka tamasa synrai kabala long mynta ka snem hadien ba la sangeh katto katne snem kadei kaba la leh hi da ki nongpynlong bad ka sorkar ka khlem lut eiei. Hynrei ka la long ka tamasa kaba jop. Ka Cherry Blossom Festival pat kadei ka lad ba Meghalaya kan ïoh ïa ka lad ban ïatreilang bad ka Japan ha kiba bun ki kam pynroi. “Kane ka tamsa kadei tang ka jingplie lynti sha ki kam pynroi kiba khambun”, la ong u Myntri Rangbah.