Press "Enter" to skip to content

Sah kut ka jingtei Iawmusiang ba jah 2000 square feet ka jaka na ka Estimate: Moonlight

Jowai, Naiwieng 27: “Ka daw tynrai ba sahkut ka jingtei ïaka Iawmusiang bad ba konsil kam ïoh pisa naka DoNER ka dei namar baka PWD Building kaba tei ïaka Iawmusiang kala Revised ïaka Estimate khlem ka jingtip jong ka DoNER bad ba kala pynjah klep haduh 2000 square feet ka jaka na ka Estimate ba sdang tei ïaka iew”, la ong u Ma Pariat haba kren haka Dorbar Tlang ba shisngi jong ka Jaiñtia Hills Autonomous District Council (JHADC) kaba long haka sngi Ba Ar.
“Ka PWD Building kala pynjah ïa kane ka jaka 2000 Square Feet hadien ba kala Revised ïaka Estimate khlem ka jingtip jong ka DoNER bad dei na kane ka daw baka Ministry DoNER ka hap phah wan jurip ïaki Engineer bad pynduh ïaka pisa 2nd Instalment ïaka konsil”, ong u Ma Pariat hapoh jong ka ïing dorbar bad jyrwait skhor ruh ïa u EM Incharge bad ka EC u MB Rymbai, CEM-JHADC ba ki dei leh ‘Home Work’ ne pynkhreh shuwa ban ai jubab ne jingshai bad kim dei ban jubab mata madei namar baka sorkar pdeng kam kyrduh pisa.
Kane ka iew ka dei kaba la kylla long elekshon issue MLA bad mynta ka kynti ruh (la poi ka samoi MDC) khlem pep kan kylla elekshon issue. La wan jurip da ki Myntri Sorkar Pdeng bad kynthup u Myntri Rangbah ka Jylla U Conrad K Sangma uba la wan jurip
dalade ïaka Iawmusiang kaba thymmai ha u bnai Nailur 19, 2018, hynrei haduh mynta kane ka iew Iawmusiang kaba thymmai kala sahkut mynta la 9-10 snem.
Nalor ka jingwan jurip u Myntri Rangbah, ka Executive Committee jong ka JHADC kawei hadien kawei kila ai da ka dorkhat kynthup ïa u Dr. Jitendra Singh, Myntri Sorkar Pdeng ba dei khmih ïaka Ministry of Development of North Eastern Region (DoNER) bad kiwei kiwei hynrei kane ka kala kut namar baka JHADC kam poi shaei shaei.
Ïa kane ka iew la sdang tei naduh u bnai Kyllalyngkot 2009 ha ka jinglut kaba T.18.9 Klur kaba bei pisa daka Ministry of DoNER kaba ka JHADC kala ïoh ïaka First Installment T.6 Klur tam, hynrei namar ka jngsahteng ka jingtei bad ka jingkiew dor ki mar ki mata la donkam pisa sa T.24 Klur ban tei haduh 6 Mala.
U Myntri Rangbah haka jingwan jurip jong u ïa kane ka iew ha u bnai Nailur ula ksai ban pyllait noh shuwa ka pisa T.12 klur ban bteng biang ia ka jingshna jong kane ka Complex kaba Ar mala, phewse ka jingshisha hi ka dei ba ka konsil kam shimkhia ban leh ïa kaba donkam.
Ka jingshisha kala paw mynta ka sngi hapoh ka Dorbar Tlang ka konsil ha kaba u EM Incharge ka tnad CWD u Ma Holando Lamin ym tip eiei ïaka duh ka dang balei ba ka konsil kam ïoh ïaka pisa (2nd Instalment) ban tei ïaka Iawmusiang bad ka jing revised ïaka estimate naka jingkylli kaba la buh da u MDC ka liang pyrshah Ma Moonlight Pariat, uba la buh jingkylli halor jinglong jingman ka Iawmusiang.
U Holando Lamin, haba jubab hapoh ka ïing dorbar ula ong ba 40 percent ka jingtrei kala dep katkum ka Utilisation Certificate kaba la ïoh naka PWD Building kaba tei ïaka Iawmusiang thymmai, hynrei wat la ka EC kala pyrshang ban kyrpad ïaka DoNER hynrei kim ïoh ïaka pisa.