Press "Enter" to skip to content

Balei ym shym ai Pulit synran ïa ka Kong Agnes bad Amita ha ka 8 tarik?

Phla lut ka Amita ha ki dkhot ka ACWE

Shillong, Naiwieng 28 : Kat kum ka khubor ba la ïoh la ïathuh ba ka Amita Sangma kaba la lah bha ban kren mynta ha ka Sngi Ba Ar haba ki dkhot jongka Assembly Committee on Women Empowerment (ACWE) ki la leit jngoh ïa ka bad ïa ka kong Agnes ha NEIGRIHMS ka la ïoh ban phla lut khoit ha ki ïa kaei kaba la jia baroh.
La ïoh jingtip ba ka la phla ba ha katei ka 8 tarik Naiwieng 2018 ha ka por mynstep haba ma ka bad ka Kong Agnes ki la hiar sha Lad Rymbai ki la leit beit sha Lad Rymbai Police Out Post ban pan pulit ban synran ïa ki na ka bynta ban leit peit bad jurip ïa ki jaka ba tih bad kit beaiñ ïa u dewiong. Hangtei ha Out Post ki la ïa ap kumba 20 haduh 25 minit ei ei namar ki ïa shong kai bad ka SI B.Shadap, u SI Comfort Lamare bad uwei u pulit langrut u Sangma uba dei uba shim shuti mynta.“La pynslem kai ïa ki ha katei ka jaka da kaba ai sha ïa ki, hynrei hadien kane ki pulit ki la pynpaw ba ym don pulit ban synran ïa ki bad lada ki kwah ban leit kin hap ïaleit hi. Ha ka por ba ki don hapoh Police Out Post la ïathuh ba la wan ruh kawei ka gypsy bad mar ïa mih ma ki na police station ruh katei ka gypsy ka la mih bad pynher sted shakhmat.“Haba la poi ha Kongong ki la shon dur shwa ïa ki trok kit dewiong kiba dang pynïeng kham shapoh khlaw. Hadien kane haba la poi ha Shohshrieh ki la ïohi biang ïa ki trok ba dang thep dewiong ki la rung kham shapoh bad shongdur ïa katei ka trok. Dei ha kum katei ka por ka Amita ka la kynnoh ba la wan mih u Nidamon Chullet bad wan sha kali jongki bad u kwah ban ïakren ia I Kong Agnes hynrei haba I kong Agnes im treh ban ïakren, ki la khreh ban mih noh bad dei ha kum katei ka por ba la tur puk ki runar bad khang kdong ïa ka kali jongki da kaba knieh ruh ïa u shabi bad sei jubor ïa ki na kali bad bom, tied ïa ki da ki dieng tylli bad dieng thlieh bad kyrdem ïa ki baroh shi rynieng ka met ka phad. Nalor kata ka Amita ka la kynnoh ruh ha ka por ba bom bad tied ruh u Nidamon u ïa don lang.“Ka jingkylli ka long don aiu ha lyndet ka jingbym ai pulit ban synran ïa ki bad don aiu ha lyndet ka jingwan ka kali sha police station. Don aiu ha lyndet ka jingbym kem ki pulit ïa u Nidamon wat haba ka Amita ka la phla bad ai jingthoh shaduh u DGP ruh.“Ka Amita ka ïathuh ba ki pulit ki shim por bha ban poi na Lad Rymbai haduh Shohshrieh. Halor kane ka jingkylli kaba mih ka long kumno ki pulit ka Lad Rymbai kim peit ngor ïa ka ïaid ka ieng kitei ki longkmie nalor ba ki tip ba ka jinglong jingman sha katei ka thaiñ ka don ha ka jingma. Shuh shuh kiba bun ki kylli kumno la ïoh jingtip shwa da u Spl. Superintendent of Police (SB-I) katba ki pulit ka Lad Rymbai bad SP ka East Jaintia kim tip ei ei halor ka jingjia.“Kat kum ka status report ba la pynpaw da ki pulit ki la ïoh jingtip halor katei ka jingjia na u heh nangne ha Shillong haka por 1.42 PM bad ki pulit ki dang poi ha Shohshrieh haduh ka por 2.15 PM katba kane ka jaka ba jia ka jingshah thombor kine ki arngut ki longkmie kam da jngai than na Lad Rymbai.