Press "Enter" to skip to content

Byrngem ka KHNAM ban mudui sha ka ECI pyrshah ïa u Bah Adelbert

Shillong, Naiwieng, 28: Ka Khun Hynñiewtrep National Awakening Movement (KHNAM) hapoh ka jingïalam jong u President u Bah Pyndapborthiaw Saiborn, ka la byrngem ban mudui ïa u Bah Adelbert Nongrum da kaba kynnoh ba u thok la shukor ïa ka Election Commission of India (ECI).
Dang ha ka lah sngi u Blei mynta ka taiew, u Bah Adelbert Nongrum uba long u MLA ba marwei ka KHNAM na North Shillong Constituency u la pynbna da kaba kam ba ka Election Commission of India (ECI) ka la ai jingithuh ïa u kum u Nongïalam ka KHNAM bad ithuh ruh ïa ki dkhot jong ka Central Executive Committee jong ka KHNAM hapoh ka jingïalam jong u. UBah Adelbert Nongrum u la phah ïa ka jingthoh sha ka Election Commission of India ha ka 14 tarik u bnai Nailur mynta u snem.
U President ka KHNAM, u Bah Pyndapborthiaw Saiborn haba ïakren bad ki lad pathai khubor mynta ka sngi baar, u la ong, “ngin sa mudui sha ka Election Commission of India pyrshah ïa u Bah Adelbert namar u la ïalam bakla wat ïa ka Election Commission. Kumno un kam hakhmat ka Election Commission of India ba u dang dei u Working President haba u ladep phah ïa ka shithi iehnohkam.”
“Ngi pynrem jur ïa u Bah Adelbert namarba kane ka jingleh jong u ka long kaba be-aiñ bad ka bym shong nongrim,” ong u Bah Pyndap bad buh jingkylli ruh ïa u Bah Adelbert, “mynno bad haei la jied ïa ki dkhot bathymmai jong ka CEC bad mynno la pynwai noh ïa ka CEM kaba rim hapoh ka jingïalam jong nga.”
Shuh shuh u la pynshai ba katkum ka Article 10 jong ka Riti Treikam jong ka KHNAM ba la mynjur da ka Election Commission of India (ECI), ka kren shai ba ïa ki dkhot jong ka CEC dei ban jied bad ban pynskhem da ka General Convention. Hynrei ka jingkam jong u Bah Adelbert ka pawshai ba u shu ïalam bakla ïa ka Election Commission of India ba ladep jied ïa ki dkhot bathymmai ka CEC.
Ïa ka CEC kaba rim hapoh ka jingïalam jong u Bah Pyndapborthiaw Saiborn la pynskhem ha ka 28 tarik, Kyllalyngkot, 2017 ïa kaba ym pat shym la pynwai satia.
Haba kylli ïa ka daw kaba pynmih ïa ka jingbym ïasngewthuh jingmut hapdeng ki dkhot ka CEC bad une u MLA bamarwei ka KHNAM, u Bah Pyndap u la ong, “ka daw hi baroh kaba la mih na ka jingïapher jingmut ka dei halor ka jingshim rai ban ai tiket ïa u Bah Thomas Passah na Jaïaw Constituency bad ïa u Bah Rocky Hek na Mawkhar Pynthorumkhrah Constiteuncy.”
“Ha ka sngi ba ngi la shim ïa katei ka rai, u Bah Adelbert u la poi sha ka jingïalang jong ka CEC hadien shikynta shiteng ba ngi la ïai ap sah ïa u bad ngi la ïathuh ruh ba ngim banse ban ïaid shakhmat ban shim ïa ka rai,” la pynshai u Bah James A Neng, Chairman ka State Election Committee ka KHNAM.
“Jin lada u Bah Adelbert u la pynpaw ha katei ka jingïalang ba um pat mynjur ïa kane ka rai jong ka CEC, ngin da la ap shwa, hynrei na ka liang jong u, u la pynpaw ba u mynjur lang ïa ka rai ba la shim da ka CEC,” la ïathuh u Bah James.
U la ïathuh ruh ba ka CEC kam banse ban rai ïa ka tiket sha u Bah Thomas namar u Bah Adelbert wat hadien hynñiew tylli ki jingïalang jong ka CEC um lah satia ban shim ïa ka rai la un ïakhun biang neem ïa ka elekshon MDC.
Shuh shuh u Bah Pyndap u la ïathuh ba kane ka jingïapher jingmut hapoh ka KHNAM kan buh jingeh bha ha ka Elekshon MDC ka ban sa long ha u snem 2019 sha ki Autonomous District Council (ADC).
U ïathuh ruh ba ka KHNAM hapoh ka jingïalam jong u, kan ym shongthait hynrei kan ïakhun beit wat ban ïaid sha ki bor ka aiñ ban mudui pyrshah ïa u Bah Adelbert.