Press "Enter" to skip to content

ïakynduh ka KSU ïa ka DC halor ka ktem shipai bad Entry Point ha Ri-Bhoi

Nongpoh, Naiwieng, 28: Tang hadien ar sngi ba ka KSU ryngkat ka FKJGP bad ka RBYF ki la hiar sha Umtyrnga ban kyrshan ïa ki paidbah ban khanglad na ka jingthmu buh ktem Shipai ki BSF ha ka thaiñ Umtyrnga, ka KSU, North Khasi Hills District mynta kasngi ka la leit ban kynduh ïa ka Deputy Commissioner ka Ri Bhoi ban pynpaw ïa ka jingpyrshah ba ka seng KSU ruh ka pyrshah halor katei ka jingthmu ban buh ktem shipai ki BSP ha ki Shnong khappud ka thaiñ Umtyrnga.
Ha kane ka jingleit kynduh ïa ka DC ka Ri Bhoi, ka Kong R.M Kurbah, ka KSU nalor ka jingïakren ban pyrshah ïa ka jingthmu buh ktem shipai ki BSF ha ki Shnong khappud ba hap ha ka Raid Marwet ha Ri Bhoi, ka seng ka la kren ruh halor ka Entry Point ba la mang ban tei ha 19mer bad ryngkat ka jingdawa na ka DC ba kadei ban pynsted noh ïa ka kam ban tei ïa ka Entry Point.
Haba ïa kren bad ki Nongthoh khubor, u President ka KSU,North Khasi Hills District, u Bah Ferdinald Kharkamni, u la ong ban a ka liang ka KSU ka la kynduh ïa ka DC ban ia kren halor ka jingthmu shim jaka ki shipai bad kum ka seng ka la pynpaw ruh ba ka pyrshah jur bad kan kyrshan ïa ki paidbah kiba pyrshah jur halor ka jingthmu shim jaka ki shipai.
U la ong ruh ka daw kaba la pynlong ïa ka seng ba pyrshah ka dei halor ka jinghuri hura ha ki kam jaka puta ha kaba haduh mynta ka seng kam pat ïoh thikna ïa ka jingtip ïa ki trai jaka ba shisha bad kumba la ujor da ki paidbah kane ka lah ban ktah ruh ïa ka jaka jong kiwei kiba ym don mon ban die sha ki Shipai.
Ha ka jingkynduh ïa ka DC, u la ong ba ka seng ïa mynta ka la kyrpad ïa ka DC ba kam dei ban shah ban rigieter ïa ki jaka ki puta ha kitei ki jaka ba thmu shim jaka ki shipai, namar ka don ka jingkynnoh ba ka ngat lang wat ha ki jaka jong kiwei ki trai jaka kiba ym don jingtip satia halor katei ka jingthmu shim jaka ki shipai.
Ka long pat ba kaba sngewkmen ba ka DC ka la kubur ban tih bniah halor katei ka jingthmu shim jaka ki shipai bad ïa mynta hi kan khanglad ban register khyndew katba ym pat la ban pynshisha ïa ki trai jaka, u la ïathuh.
U la ong ruh ban a ka liang ka seng ruh ka khot ïa u Syiem ka Raid Marwet, u Paiem Ken Syiem ba ïa kren halor kitei ki jaka bad ka seng ka la kyntu ruh ïa u Paiem ba un lum lut ïa baroh ki trai jaka ban pynshisha kino kita ki trai jaka kiba thmu ban die jaka sha ki Shipai kaba wat u syiem ruh u la kular ban lum ïa ki trai jaka.
Ha kaba ïa dei pat ba ka Entry Point ha 19mer, u Bah Kharkamni u la ong ba u la kren ruh sha ka DC ba ka dei ban pynsted noh ïa ka kam, namar kumba long haduh mynta ka sorkar ka la shim ïa ka jaka bad ka la lah ban pyndep haduh ka section 11 jong ka Land Acquisition Acts.
U la ong ruh kumba ki 13 seng ki la dawa ban pynsted noh ïa ka kam ka seng ka la kren ruh ha ka DC ba kam dei shuh ban sngap ïa kino kino ki jingpynthud, hynrei ka dei ban pynsted ïa ka kam khnang ban lah ban pyndep noh ïa ka Entry Point kaba long kawei na ka jingkhanglad ban rungtuh ki mynder ne ki bar jylla kiba ym don kot don sla.