Press "Enter" to skip to content

ïatai ka jingïalang ka UDP MDC Constituency Amlarem halor u kyrtong ka party

Shillong, Naiwieng :U Bah H. Pohchen u ba long u President ka UDP na II War Central Constituency MDC 7 Amlarem, ha ka jingïalang ka ba la long ha ka 17 tarik mynta u bnai ha Mang Hai Ryum Hr. Sec. School, Amlarem ki la ïatai sani bha na ka bynta ban ïoh ïa u kyrtong uba ïa mon lang ki paidbah na ka bynta kane ka election MDC kaban long shen ha u snem 2019.
Kumta na ka liang ka Primary Unit baroh ki member sha ki 31 tylli ki Village Unit ha ka war central constituency MDC ka la rai da kawei ka jingmut ban pynbna paidbah ha ka kot khubor ba kino kino ba kwah ban ïaleh MDC bad ban long u kyrtong jong ka UDP War Central la ai lad ba kin apply naduh ka 18 tarik mynta u bnai haduh 15 tarik Nohprah 2018.
La kyntu ruh ba kin sngewbha ban thoh da ka application sha u Secretary/President jong ka Primary Unit War Central khnang ba kin lah ban phah ïa ka kyrteng sha ka circle bad ka District Election Committee bad sha ka State United Democratic Party (UDP) ba kan sa ïoh ban pynbna ïa uno uno u kyrtong uba la dep jied hapoh ka party.
Na ka liang ka Primary Unit ka la kwah ban jied ne ban apply da ki briew kiba ïatrei lang bad ka party khamtam eh bad u Local MLA uba long u Myntri Sorkar ha kane ka jylla bad kumjuh ruh uba dei ban long u dkhot ba pura jong ka party bad u ban ïa trei ryngkat ryngkat bad ka party UDP khnang ba yn lah ban wanrah ïa ka jingkyla ha ka roi ka par bad ka imlang ka sahlang ha kane ka Constituency kaba dang sahdien ha kiba bun ki liang.
Na ka liang jong u Bah K. Pohshna ula ong ba ha kane ka Election MDC ka ban sa long ha u snem 2019, ka party UDP kam don jingeh ban jop ha baroh lai tylli ki constituency MDC ha ka 7-Amlarem da ka jingtrei shitom u Ma Lahkmen Rymbui ban wanrah ïa shibun ki kam pynroi hapoh ka 7-Amlarem Constituency.
Kumta na ka liang ka party ka kyrpad jur ïa ki paidbah ban ïa treilang ryngkat ryngkat bad ki kyrtong kiba yn sa pynbna bad ai tiket khnang ba yn lah ban wanrah ïa ka roi ka par katkum kane ka juk kaba mynta. Kane ka long katkum u kyrwoh lyngba u Bah K.Pohshna.