Press "Enter" to skip to content

Ki Harijan ba shong be-aiñ ha Them Mawlong kin hap ban mih ne ap ka shah kyndang

Ai por khatduh ka HLC haduh ka 10 tarik Nohprah

Shillong, Naiwieng 28: Ka High Level Committee jong ka Sorkar Jylla kala kren shai kdar hynne ka sngi ba ki briew (Harijan) ba shong be-aiñ ha Them Metor, Iew Mawlong ki dei ban mih noh dalade na kane ka jaka lym kumta kin ngat ha ka jingshah kyndang haba pynpaw ba ïa ki Nongtrei jong ka Shillong Municipal Board (SMB) bad kiwei kiwei ki Tnad yn sa pynkynriah noh sha kiwei ki jaka.
Ka High Level Committee bala khlieh da u Symbud Myntri Rangbah (DyCM) Bah Prestone Tynsong kala dep pynmih ruh da ka Public Notice ïa kiba shongshnong ha Them Metor, Iew Mawlong, kaba aipor haduh ka 10 tarik Nohprah ba kin pynithuh ïalade hakhmat ka SMB la ki dei kiba la ithuh ban shongshnong da ki bor Sorkar lane kiba shu shong be-aiñ ha kane ka jaka, kaba hap hapoh ka Hima Mylliem.
Lah ban kdew hangne ba u Chief Executive Officer (CEO) ka SMB ula pynmih ïa ka Public Notice ha ka 26 tarik Naiwieng kat kum ka jingbthah jong ka High Level Committee, kaba long ruh ka jingaipor ba khatduh ïa baroh ki Nongshongshnong ka Them Metor hadien ka jingkyntait ban iatreilang bad ki Bor Sorkar kiba leit leh ïa ka survey bad ban lum khana samari ïa ka jingdon ki longïing ba sah ha kane ka jaka ha ki bnai bala leit noh.
Ka High Level Committee kaba shong ïa ka jingïalang ba san hynne ka sngi, kala shim ïa ka rai ban ap shuwa ïa ka jingkut ka jingaipor (10 tarik Nohprah) ka Public Notice bad kan sa shong jingïalang biang ha u bnai Nohprah ban shong pyrkhat ïa kaei ka sienjam ba dei ban shim.
“Mynta ngi khlem pat shim rai eiei ïa kane ka kam bad ngin ap shuwa ïa ka jingkut ka por bala kdew ha ka Public Notice” ong u Bah Prestone Tynsong haba ïakren bad ki lad pathai khubor hadien ba wai ka jingïalang.
Kat kum ka jingong jong u, shisien bala pynmih ïa ka Public Notice, ka shong ha ka jingstad jong kine ki briew ba sah ha Them Metor ba kin leit mih sha ka Ophis ka SMB. U ong “Lada kim leit mih, ngam ong kumno kumno ruh ïa ki hynrei tang kawei nga ai jingmut ba kan bha shibun ba kin leit mih namar lada kim leit ka mut bala thikna ba ki dei kiba shu shong be-aiñ…shisien ba phi dei ba shong be-aiñ, pynkhreh lupa ban mih noh na kane ka jaka”.
“Naduh ka sngi ba nyngkong nga la kren shai lyngba ki lad pathai khubor ba ki Nongshongshnong be-aiñ ha Them Metor ki dei ban long kiba la khreh ban mih noh na kane ka jaka bad wat ap ïa ka por haduh ban da kyndang jubori” ong u Symbud Myntri Rangbah haba pynpaw ba kane ka dei ka nongrim kaba ka Committee ka ieng skhem haduh mynta.
Haba pyntip ba baroh ki Dkhot ka Committee ki sngew dei ban pyndep noh kloi katba lah ïa ka kam bala bynshet bad ban aiti noh ruh ïa kijingai jingmut sha ka Sorkar, u Symbud Myntri Rangbah ula ong “Ka Committee kala bthah ïa ka SMB ba kan wad jaka pynlong Ophis thymmai katbym pat dep ka Ophis ba pura jong ka, na ka bynta ban pynkynriah noh ïa ka Ophis ba shipor na ki Staff Quarter ba don ha Bishop Cotton Road , ban ïoh ai jaka sah noh ïa ki Nongtrei ka SMB ba sah ha Them Metor”.
“Kumba long mynta, ka SMB kala pynlong Ophis ba shipor ha kumba 30 tylli ki Housing Quarter ha Bishop Cotton Road napdeng ki 70 tylli ki Housing Quarter kiba don ha kane ka jaka” ong u Bah Prestone haba bynrap “Ka Committee ka sngewdei ba ka SMB kan pynkynriah noh ïa ki Nongtrei ba sah ha Them Metor sha kine ki Quarter kat kaba ngiam bad ïa kiba tam yn sa ai jing mut ban ai noh da ka House Rent ne baiwai ïing”.
Kat kum ka jingong jongu, na ki kot ki sla bala ïoh lum da ka Committee na ki Tnad bapher bapher ka Sorkar, haduh 128 ngut ki briew ba sah ha Them Metor ki dei kiba treikam hapoh ka Shillong Municipal Board (SMB) bad 56 ngut ki dei kiba trei ha ki Tnad bapher bapher ka Jylla hynrei kiba tam ki dei kiba shu shong be-aiñ.
Haba bynrap ïa kane, u Dkhot ka Committee uba dei u MLA ka HSPDP na Mawkyrwat Bah Renikton Lyngdoh Tongdhar ula ong “Ka Committee kala shimkhia bha ïa kane ka kam. Ka jingbthah ïa ka SMB ban wad jaka pynlong Ophis ba thymmai ka dei ka lynti kaba biang bha namar ban pynkynriah ïa ki briew ka long kaba eh hynrei ban pynkynriah ïa ka Ophis kam dei kaba eh”.
Haba ïadei bad ki Nongtrei jong kiwei kiwei ki Tnad, u Bah Prestone ula ong ba ka Committee ka sngew dei ba ki Tnad ki dei ban shimkhia ïala ki jong ki Nongtrei ban ai jaka sah. U ong “Ngin sa thoh sha ki Tnad ba kin shimkhia ïala ki jong ki briew ba nga ruh kum u Myntri ka Tnad PWD, ngam shimkhia ïa ki Nongtrei ka Tnad bad ngin ai jaka sah ïa ki ha ki jaka lajong. Baroh ki Dkhot ka Committee ki iadonlang ïa kane ka juh ka jingmut”.
Haba kylli kaei kaban jia lada kine ki Nongtrei ka Sorkar ki kyntait ban kynriah na Them Metor sha ki Quarter, u Symbud Myntri Rangbah ula ong “Kane ka jingkylli kan nym mih satia bad haba ka Sorkar ka rai, ki nongtrei kin hap ban kohnguh beit”.
Ki paid Harijan ba shongshnong ha Them Metor kila pynpaw ïa ka jingpyrshah kaba jur ïa ka jingthmu jong ka Sorkar ban pyn kynriah ïa ki sha kiwei ki jaka bad kila pynlong ruh ïa ki jingïakhih da kaba khang tala ïa ki Ïing ki sem ha ki bnai bala lah ban pyndkoh ïa ka jingwan lum khana samari jong ki bor Sorkar.
Haba kylli ïa kane, u Bah Prestone ula ong “Lada kim iatreilang sa mynta, ka Aiñ ka don bad ngin hap pyntreikam ïa ka aiñ bad ngin ïaid ruh kat kum ki kyndon ka Aiñ khnang ban nym mih ka jingtynjuh hapoh ki Ïingkashari hadien habud”.
Haba bynrap ïa kane, u Dkhot ka Committee uba dei ruh u Myntri kam pynroi sor Bah Hamlet Dohlong ula ong “Ka Committee kan pyrshang ban ïaid da kano kano ka lynti ka ban lait na ka jingiatakhuh bad kiwei pat ki bor”.