Press "Enter" to skip to content

La kyrkhu bad plie sa kawei ka kamra die kot ha Pauline Book

Shillong Naiwieng, 2018: Kito kiba smat ban leit thied kot n Pauline Book , Media Centre ha Laitumkhrah, Shillong kin sngewtynnad lehse ban tip ba kane ka Centre ka la nang kham heh da ka jingpynkha sa ïa kawei ka kamra, ban die ïa ki tiar khuid bad ki kot pule ym tang kito kiba ïadei bad ka jingngeit Kristan Katholik hynrei kiwei kiwei ki jait kot ruh, ïa kaba la kyrkhu bad plie da u Vicar General u Rev Fr John Madur ha ka Sngi Nyngkong ka 26 u ‘Naiwieng.
Kan ïarap ban tip ba ka Pauline Book , Media Centre ka die ym tang ïa ki tiar khuid bad ki kot pule ïa ki khynnah skul bad samla pule hynrei ïa ki kot kiba ïarap ban kyntiew bad saiñ dur ïa ka pyrkhat pyrdaiñ ha ki phang bapher bapher jong ka pule ka puthi ruh.
Ki kot pule ba kane ka Centre ka don ka kynthup ïa ki Macmillan Popular Classics, kiba naduh ki phew snem ba la leit ki la pynsngewtynnad ïa ki khynnah skul bad samla pule ba bun, kum ka Grimms Fairy Tale, Alice’s Adventure in Wonderland and Through The Looking Glass da u Lewis Carrol, A Christmas Carol, Oliver Twist, The Pickwick Papers bad kiwei kiwei ba la thoh da u Charles Dicken; ki kot jingïathuh khana shaphang Sherlock Holms da u Arthur Conan Doyl bad ki kot ba la thoh da ka Jane Austen bad kiwei kiwei ki nongthoh.
Ki kot ba la thoh da ki nongthoh kot India ki kynthup ïa ki kot ba la thoh da u Presdident barim jong ka Ri India u A P J Abdul Kalam, ki kot da u Robin Sharma bad
ki kot na ka bynta ki khynnah da u Ruskin Bond.
Na kane ka Centre lah ruh ban ïoh ki kot “self-improvement” kum ka Improve Your Memory, Study and Reading Skills Creatively da u V Turker SJ; Tips To Study Better da u Pancha Baida; How to Speak Any Language Fluently da u Alex Rawlings bad ka kot kaban iarap bha ia ki nonghikai: How To Evaluate Students da ka BernadettePinto.
Ha ka jingkren plie bad jingkyrkhu jong u ïa ka kamra thymmai jong kane ka Centre, u Fr John Madur, u la pynpaw jingkyrmen ba ki nongpule kot babun kin shim kabu ïa ki lad kiba kane ka Centre ka don ban ai ha ki da ka jingthied jong ki ïa ki kot pule ba kane ka jaka ka don. “Ka jingpule ïa ki kot babha ka long ka jingmyllien babha,” u la ong.
Da kaba pynïasyriem ïa ka jingpule ia ki kot babha bad “ka jingduwai,” u Fr John Madur u la ong, “da ka jingpule ïa ki kot babha ngi pyndon burom ïa u Kpa ba ha Bneng.”